उपचारका लागि जनकपुर अस्पतालमा भर्ना गरिएका बेला भागेका कैदीलाई धनुषा प्रहरीले पक्राउ गरेको छ।
जलेश्वर कारागारका प्रमुख चिरञ्जीवी थापाले पिसाब फेर्ने बहाना बनाएर अस्पतालबाट भागेका रञ्जित यादवलाई बिहीबार राति जनकपुरको रेलवे स्टेशनबाट पक्राउ गरिएको जानकारी दिए।
चोरी मुद्दामा पुर्पक्षका लागि जिल्ला कारागार जलेश्वरमा रहेका रञ्जित माघ ९ गते अस्पतालबाट पिसाब फेर्न जाने भन्दै भागेका थिए। गत मंसिरदेखि पुर्पक्षका लागि कारागारमा रहेका उनलाई एपेन्डिक्सको उपचार गर्न जनकपुर लगिएको थियो।
हत्कडी लगाएकै अवस्थामा कैदी भागेपछि प्रहरीले खोजी तीव्र बनाएको थियो।
