ट्राफिक प्रहरीले कलंकीका विभिन्न स्टेशनबाट सवारी साधनले ‘पिक एण्ड ड्रप’ गर्नुपर्ने भन्दै नयाँ कार्ययोजना ल्याएको छ।
कलंकी चोकमा बनेको अन्डरपासका कारण पनि त्यहाँ जाम घट्न नसकेपछि सवारी साधनलाई व्यवस्थित बनाउन नयाँ कार्ययोजना ल्याइएको हो।
महानगरीय ट्राफिक प्रहरी प्रभाग कलंकीको आयोजनामा भएको कलंकीका ट्राफिक व्यवस्थापनसम्बन्धी एक दिने कार्यक्रममा बोल्दै ट्राफिक प्रहरी महाशाखाका प्रमुख बसन्त कुमार पन्थले यात्रुहरूको सहजताका लागि नयाँ कार्ययोजना ल्याएको बताएका हुन्।
महाशाखाका प्रमुख पन्थका अनुसार थानकोटदेखि कलंकी चोकबाट १०० मिटरमाथि कलंकी मन्दिरमा मात्र सवारी साधनले यात्रु ओराल्ने र उकाल्ने गर्न पाउनेछन्। त्यस्तै, सोल्टीमोडबाट आएका यात्रुबाहक सवारी साधनहरू खड्कुलेको पुलमा रोक्नुपर्ने छ भने सितापाइलाबाट आएको सवारी साधनलाई कलंकी खसी बजार र खसी बजारबाट सितापाइलातर्फ आइरहेको सवारी साधनले मकालु नजिकैको स्थान कायम गरिएको बताए ।
उनका अनुसार काठमाडौंबाट छुट्ने सवारी साधनमा कलंकी चोकबाटै यात्रु चढ्ने र ओर्लने गरेकाले त्यहाँको ट्राफिक थप अस्तव्यस्त बनेको कारण अब ढुंगे अड्डाबाट मात्र यात्रु चढाउने व्यवस्था गरिएको हो। राजधानी भित्रने सवारी साधनको हकमा मकालु पेट्रोल पम्म वाफल पुल नजिक यात्रु ओराल्न पाउने व्यवस्था गरिएको छ।
दैनिक ४ हजार देखि ५ हजारसम्म यात्रुबाहक सवारी साधन काठमाडौं भित्रिने र बाहिरिने महानगरीय ट्राफिक प्रहरी प्रभाग कलंकीका प्रहरी निरीक्षक केशवराज भट्टले जानकारी दिए।
यसैगरी, कार्यक्रमा बोल्दै यातायात व्यवस्था विभागका महानिर्देशक कुमारप्रसाद दाहालले सञ्चालन भएका बस टिकट काउन्टरलाई व्यवस्थित गर्ने विभागको योजना रहेको पनि बताए।
महानिर्देशक दाहालल भने, ‘काठमाडौंका विभिन्न स्थानमा अव्यवस्थित रूपले सञ्चालन हुँदै आएका बस टिकट काउन्टरको अध्ययन गरी यसलाई व्यवस्थित गर्न ट्राफिक प्रहरी र हामी चाँडै पहल गर्नेछौं।’
यस्तै, कलंकी तथा गौशाला क्षेत्रमा जथाभावी रूपमा राखिएका टिकट काउण्टर ७ दिनभित्र हटाइने भएको छ।
टिपरलाई ट्राफिक प्रहरीको पास
भक्तपुर र कलंकी नाकाबाट गुड्ने टिपरलाई अब ट्राफिक प्रहरीले पास दिने भएको छ । मालवाहक टिपरलाई उपत्यका प्रवेश निषेध गरिएकोमा टिपरहरूको प्राविधिक जाँचपास गर्न कठिनाइ हुँदै आएपछि त्यसको पास अब ट्राफिक प्रहरीले नै दिने भएको हो ।