कुटपिट गरेर श्रीमतीको हत्या गरेपछि श्रीमान् प्रहरीकहाँ पुगेका छन्।
यो घटना काठमाडौं महानगरपालिका वडा नम्बर ६ को हो।
काठमाडौं महानगरपालिका वडा नम्बर ६ मा डेरा गरी बस्ने ओखलढुंगा सिद्धिचरण नगरपालिका वडा नम्बर ३ का ३५ वर्षीय सन्तोष परियारले श्रीमती अनिशा चाहारलाई कुटपिट गरी हत्या गरेर बौद्ध प्रहरीमा आत्मसमर्पण गरेको प्रहरीले जनाएको छ।
मंगलबार राति श्रीमतीलाई कुटपिट गरेर उनी बौद्ध प्रहरीमा पुगेका थिए। उनले घटनाबारे जानकारी गराएपछि बुधबार बिहान साढे ८ बजे प्रहरी उनको डेरा पुगेको थियो।
सन्तोषले कुटपिट गरेर ३५ वर्षीया श्रीमतीको हत्या गरेको प्रहरीले जनाएको छ। शरीरका विभिन्न भागमा कुटपिट गरेको निलडाम देखिने प्रहरीको भनाइ छ।
शव पोस्टमर्टमका लागि त्रिवि शिक्षण अस्पताल पठाइएको जिल्ला प्रहरी परिसर काठमाडौंका एसपी नवराज अधिकारीले बताए। मंगलबार राति सन्तोष र अनिशाबीच विवाद भएको थियो।
यस घटनामा प्रहरीले थप अनुसन्धान गरिरहेको जनाएको छ।
