न्यूजिल्याण्डकी प्रधानमन्त्री जयासिन्डा आर्डर्नले 'इंगेजमेन्ट' गरेकी छन्। लामो समयदेखि प्रेमी रहँदै आएका कार्ल्क गेफोर्डसँग उनले इंगेजमेन्ट गरेकी हुन्।
शुक्रबार एक समारोहमा प्रधानमन्त्री आर्डर्नको औंलामा हिराको औंठी देखेपछि धेरैले चासो राखेका थिए। यो चासो पुष्टि गर्दै आर्डर्नका प्रवक्ताले उनीहरूको इस्टर पर्वमा इंगेजमेन्ट भएको बताएका बिबिसीले जनाएको छ।
प्रधानमन्त्री आर्डर्न र गेफोर्ड केही समयदेखि सँगै बस्दै आएका छन्। गेफोर्ड टिभी कार्यक्रम प्रस्तोता हुन्।
गत वर्ष मात्र आर्डनले छोरी जन्माएकी थिइन्। उनको नाम 'नेभ ते अरोहा' हो। प्रधानमन्त्री हुँदै बच्चा जन्माउने आर्डर्न दोस्रो व्यक्ति हुन्। पहिलो व्यक्ति पूर्व पाकिस्तानी प्रधानमन्त्री बेनेजिर भुट्टो हुन्।
आर्डन र गेफोर्डले सन्तान जन्माइसकेपछि उनीहरूले बिहे गर्लान् कि भनेर धेरैले अनुमान गरेका थिए। गत जनवरीमा आर्डर्नलाई एक पत्रकारले 'तपाईं गेफोर्डलाई बिहेका निम्ति प्रस्ताव गर्नुहुन्छ' भनेर सोधेकी पनि थिइन्।
त्योेबला आर्डनले भनेकी थिइन्, 'अहँ, म सोध्दिनँ। त्यो प्रश्नले उसैलाई खाइरहोस्।'
साथै गेफोर्ड घरमै बुबाको भूमिका निर्वाह गरेर बस्न चाहेको पनि उनले बताएकी थिइन्।
'म आफूलाई निकै भाग्यमानी ठान्छु,' उनले भनेकी थिइन्, 'मेरो साथमा यस्ता साथी छन्, जो मसँगसँगै हुन्छन्। जसले हाम्रो सन्तानको जिम्मेवारीमा ठूलो भूमिका खेलिरहेका छन्। उनी बच्चा हेर्न बसेका मान्छे होइनन्। बुबाका रूपमा आफ्नो जिम्मेवारी पूरा गर्न बसेका हुन्।'
सञ्चारमाध्यमहरूका अनुसार प्रधानमन्त्री आर्डन र गेफोर्डको सन् २०१२ मा एउटा कार्यक्रमबीच भेट भएको थियो।
