वनमा सल्किएको डढेलो बस्तीसम्म फैलिँदा ८ वटा घर/गोठ जलेर नष्ट भएका छन्।
घोराही उपमहानगरपालिका वडा नं. १ स्थित सल्लिबोट सामुदायिक वनमा लागेको डढेलो बस्तीसम्म पुगेपछि स्थानीय व्यक्तिका ६ वटा घर र २ वटा घर जलेर नष्ट भए।
आगलागीबाट घोराही १ तल्लो माले निवासी ४२ वर्षीय चुमानसिंह विष्टको एउटा घर र गोठ, सोही ठाउँकै ६० वर्षीय गमबहादुर गमालको दुइटा घर, ३२ वर्षीय टुकमान गममालको एउटा घर, श्यामलाल विष्टको दुइटा घर र एउटा गोठ जलेर नष्ट भएको छ।
जिल्ला प्रहरी कार्यालयका प्रहरी प्रवक्ता विनोद विक्रम शाहका अनुसार उक्त आगलागीमा परी साढे ३१ लाख बढीको क्षति भएको छ। वनमा सल्केको डढेलो हावाहुरीका कारण बस्तीसम्म पुग्दा उक्त आगलागी भएको प्रहरीले बताएको छ।
मंगलबार बेलुकी आगो वनबाट बस्तीमा पुगेको थियो।
