विभिन्न नक्कली कार्डहरुमार्फत राष्ट्रिय वाणिज्य बैंक काठमाडौंका विभिन्न एटिएमबाट रकम निकाल्ने राजकुमार पाण्डेलाई प्रहरीले पक्राउ गरेको छ।
प्लास्टिक म्याग्नेटिक कार्डको प्रयोग गरी उनले गैह्रकानूनी रुपमा २० लाखभन्दा बढी रकम निकाल्न सफल भएको प्रहरीले जनाएको छ।
प्रहरीका अनुसार अदालतबाट ७ दिनको म्याद लिई अनुसन्धान थालिएको छ।
बारा पिपरपानीका पाण्डे शंखमुलमा बस्दै आएका छन्। उनको साथबाट सादा कार्ड २ थान, शिशिर भण्डारीको नाममा प्रभु बैंकको भिषा कार्ड १ थान, स्टेट बैंकको मास्टर कार्ड १ थान, दिपावली पाण्डेको नाममा नविल बैंकको भिषा कार्ड १ थान, पजल बस्नेतको नाममा रहेको सेन्चुरी बैंकको भिषा कार्ड १ थान लगायत १२ वटा कार्डहरु बरामद भएको छ। त्यस्तै १ सय दरका ६६२ थान नोट, ५ सय दरका ४८ थान नोट र एक आइफोन बरामद गरिएको प्रहरीले जनाएको छ।
पक्राउ अभियुक्त राजु पाण्डेले अन्य ३ जना रोमियन नागरिकहरुसँग मिली एटिएमबाट पैसा निकाल्ने गरेको खुल्न आएको छ। पाण्डेले ति विदेशीसँग रकम बाँडफाँड गरेर लिने गरेको प्रहरीले जनाएको छ। प्रहरीका अनुसार ति विदेशीहरुले भने नेपाल छाडिसकेका छन्।
प्रहरी अनुसन्धान ब्यूरोले हालसम्म ९५ लाख ६२ हजार ८५० रुपैयाँ, अमेरिकी डलर ७५ हजार २ सय २५, युरो ७३ हजार ८ सय ७५, ईन्डोनेसियन रुपी ३३ हजार, फिलिपिन करेन्सी ४७० र विभिन्न १३६९ थान कार्ड बरामद गरिसकेको छ। एटिएम कार्ड ठगीमा ब्यूरोले हालसम्म ६ नेपाली, ४ रोमानियन, ४ टर्कीस, ४ बुल्गेरियन, २ भारतीय र ४ मोल्दोभियन गरी जम्मा २४ जनालाई पक्राउ गरिएको जनाएका छ।