त्रिभुवन विमानस्थलको धानवमार्गमा चिप्लिएको यति एयरलाइन्सको जहाज निकाल्न नसक्दा विमानस्थल सात घन्टादेखि बन्द छ।
साँझ छ बजेसम्म जहाज चिप्लिएको ठाउँबाट दस फिट तानिएको विमानस्थल प्रहरी प्रमुख एसएसपी सन्दीप भण्डारीले जनाए।
केही तानेर अहिले सजिलोका लागि गिट्टी बिछ्याउने काम भइरहेको भण्डारीले बताए।
नेपाली सेना, प्रहरी तथा इन्जिनियरहरूको टोली जहाज निकाल्न सक्रिय छ। सेनाको एपिसी टोलीले जहाजलाई तानिरहेको छ।
‘आज राति अबेरसम्ममा जहाज निकालेर विमानस्थल सुचारू गर्ने योजना छ,’ एसएसपी भण्डारीले भने।
यतिको एटिआर जहाज अवतरण गर्ने क्रममा शुक्रबार बिहान ११ बजेर पाँच मिनेटमा चिप्लिएको थियो। जहाज धावनमार्गबाट बीस मिटर पर घाँसे मैदानमा पुगेको छ
वर्षा जारी रहेका कारण जहाज निकाल्न कठिनाइ भएको उनले बताए।
जहाज तान्न नसकेपछि विमानस्थल कार्यालयले नोटाम समयलाई बढाउँदै लिएको छ। बेलुका सात बजेसम्मका लागि नोटाम जारी गरिएको विमानस्थल प्रवक्ता प्रताव तिवारीले जानकारी दिए।
बिहानदेखि विमानस्थल बन्द हुँदा अहिलेसम्म सबै आन्तरिक उडान रोकिएका छन्। त्यस्तै एक दर्जन अन्तर्राष्ट्रिय उडान डाइभर्ट भएका छन्।
विमानस्थल कार्यालयका अनुसार कतार एयरवेजको जहाज कोलकत्ता, सिचुवान एयरलाइन्सको ल्हासा, चाइना साउदर्नको कोलकत्ता, विमान बंगलादेशको ढाका, थाई एयरवेजको बैंकक, नेपाल एयरलाइन्सको नयाँ दिल्ली, मालिन्दो एयरको ढाका, इन्डिगो एयरलाइन्सका उडान डाइभर्ट भएका छन्।
त्यस्तै थाइ लायनको बैंकक, भुटान एयरलाइन्सको पारो, इन्डिगो एयरवेजको उडान डाइभर्ट भएका छन्।
