गत चैत १७ गते बारा पर्सामा आएको हावाहुरी (टोर्नाडो) मा परेर घाइते भएकाहरूको उपचार खर्च बापत वीरगञ्जस्थित नेसनल मेडिकल कलेजले प्रदेश सरकारबाट ३१ लाख ३८ हजार २८४ रुपैयाँ भुक्तानी लिएको छ।
टोर्नाडो पीडितको उपचारको क्रममा कलेजका प्रबन्ध निर्देशक बसरुद्दिन अन्सारीले घाइतेहरूको उपचार नि:शुल्क गर्ने घोषणा गरे पनि अहिले आएर २३२ जना घाइतेको उपचार गरेको भन्दै प्रदेश सरकारबाट सम्पूर्ण रकम लिएका हुन्।
प्रधानमन्त्री केपी शर्मा ओली घाइतेहरूको निरीक्षण गर्न अस्पताल पुगेको बेला अन्सारीले सञ्चारकर्मी समक्ष नि:शुल्क उपचार गर्ने घोषणा गरेका थिए।
तर अस्पतालका निर्देशक आविद हुसेनले नि:शुल्क उपचार गर्नेबारे आफूलाई कुनै जानकारी नरहेको र मुख्यमन्त्री लालबाबु राउतले उपचार खर्च प्रदेश सरकारले व्यहोर्ने घोषणा गरे बमोजिम आफूले रकम लिएको बताए।
अस्पतालले त्यतिबेला विभिन्न ठाँउमा नि:शुल्क उपचार र खानाको व्यवस्था गरेको भन्दै पर्चा समेत टाँसेको थियो। तर अहिले आफैंले गरेको घोषणाविपरीत रकम लिएको पाइएको छ।
यसैगरी वीरगञ्जस्थित वीरगञ्ज हेल्थ केयर हस्पिटलले समेत १० लाखको चेक पाएको छ। हेल्थ केयरका चेयरम्यान डा.अब्दुल हैसले उक्त चेक बुझेका हुन्। दुवै अस्पताललाई मुख्यमन्त्री लालबाबु राउतले आज चेक हस्तानतरण गरे।