चितवनका स्थानीय तहहरुले एचआइभी सङ्क्रमितहरुको स्वास्थ्य बीमा गर्न सुरु गरेका छन्।
स्थानीय तहहरुले आफ्नो नीति तथा कार्यक्रमअन्तर्गत बीमा कार्यक्रम सुरु गरेका हुन्। अहिलेसम्म जिल्लामा रहेका ११० जना सङ्क्रमितको स्वास्थ्य बीमा गरिएको छ।
भरतपुर महानगरपालिकाले ५७, कालिका नगरपालिकाले १३, रत्ननगर नगरपालिकाले नौ, राप्ती नगरपालिका र माडी नगरपालिकाले आठ/आठ र खैरहनी नगरपालिकाले पाँच जनाको स्वास्थ्य बीमा गरेको भरतपुर अस्पतालको एएचएफ नेपालका कार्यक्रम प्रमुख कृष्णहरि सापकोटाले जानकारी दिए।
सापकोटाका अनुसार भदौबाट लागू हुनेगरी उनीहरुको बीमा गरिएको हो। सङ्क्रमितहरुको स्वास्थ्यमा धेरै समस्या देखिने भएकाले बीमा गरिएको उनले बताए।
अहिले जिल्लामा एक हजार ७२९ जना सङ्क्रमित छन्। उनीहरुमध्ये ८९७ जनाले नियमित औषधि सेवन गरिरहेका छन्।
जिल्लामा रहेका सबै सङ्क्रमित खुलेर बाहिर आउन सकुन् भन्ने उद्देश्यले स्थानीय तहहरुसँगको समन्वयमा बीमा कार्यक्रम सुरु गरिएको सापकोटाले जानकारी दिए।
अस्पतालमा औषधि खाएको प्रमाण पेश गरेपछि सङ्क्रमितको बीमा स्थानीय तहले गर्ने गर्दछ।
सन् २०१९ को जनवरीदेखि जुनसम्म सात हजार ८०१ जनाको नमूना परीक्षण गर्दा ५४ जना सङ्क्रमित भेटिएका छन्। रासस
