विद्यालयका कर्मचारी श्यामहरि घिमिरे जंगलमा मृत फेला परेपछि आवश्यक छानबिनको माग गर्दै गोरखा नगरपालिका वडा नम्बर ९ र १० का बासिन्दाले मनकामना आवासीय बहिरा माध्यमिक विद्यालयमा ताला लगाइदिएका छन्।
घिमिरेको हत्या भएको भन्दै छानबिन गर्न माग गर्दै स्थानीयले बिहीबार आँबुखैरेनी-गोरखा सडकखण्ड चक्काजाम गरेका थिए।
त्यसपछि उनीहरूले विद्यालयमा ताला लगाएका हुन्। घिमिरेको शव गत मंगलबार विद्यालय नजिकै जंगलमा फेला परेको थियो।
घिमिरे विद्यालयमा भान्सेका रूपमा लामो समयदेखि कार्यरत थिए। सोमबार बेलुकी विद्यार्थीलाई खाना खुवाएर घर जाँदा घिमिरे बाटोबाटै हराएका थिए। टाउको र खुट्टामा चोट लागेको अवस्थामा शव जंगलमा फेला परेपछि उनको हत्या भएको भन्दै स्थानीय बासिन्दा आन्दोलनमा छन्।
शवलाई परीक्षणका लागि गोरखा अस्पतालमा राखिएको छ। घटनाबारे सूक्ष्म अनुसन्धान नभएसम्म शव नबुझ्ने स्थानीय बासिन्दाले अडान राखेका छन्। विद्यालयका सात जना विद्यार्थीलाई नियन्त्रणमा लिएर प्रहरीले अनुसन्धान सुरू गरेको छ।