जिल्ला प्रहरी कार्यालय झापाले मानव बेचबिखन तथा ओसारपसार मुद्दामा आठ वर्षयता फरार अभियुक्तलाई शुक्रबार पक्राउ गरेको छ। पक्राउ पर्नेमा गौरीगन्ज गाउँपालिका वडा नम्बर ४ का २५ वर्षीय दीपकप्रसाद गिरी छन्। जिल्ला प्रहरी कार्यालय झापाको टोलीले उनलाई शुक्रबार उनलाई घरबाटै पक्राउ गरेको हो।
काजीमान खड्काको जाहेरीमा जिल्ला अदालत झापाले गिरीविरुद्ध एक वर्ष कैद हुने फैसला गरेको थियो।
यस्तै, लागुऔषध मुद्दामा २६ वर्षदेखि फरार मेचीनगर नगरपालिका-२ का ५४ वर्षीय टंक खनाललाई प्रहरीले पक्राउ गरेको छ। २०५० सालदेखि फरार उनलाई झापा जिल्ला अदालतले २०५४ सालमा एक वर्ष सजाय हुने फैसला सुनाएको थियो।
पक्राउ परेकालाई अदालत पेश गरिएकोमा अदालतले झापा कारागार चलान गरेको झापाका प्रहरी उपरीक्षक दिनेश मैनालीले बताए।
