तेस्रो मुलुकबाट आयातित छोकडा पर्सा हुँदै भारत तस्करी हुने गरेको पाइएको छ।
आइतबार राति प्रहरीले ठूलो परिमाणमा तेस्रो मुलुकबाट आयातित छोकडा पर्साबाट समातेको छ।
पर्सा प्रहरीले चोरी बाटोबाट भारततर्फ निकासी हुन लागेको १५ लाख रुपैयाँ बराबरको छोकडा पक्राउ गरेको हो।
पर्साका दुई अलग ठाउँबाट प्रहरीले आइतबार राति बजे ठूलो परिमाणमा छोकडा बरामद गरेको हो।
पर्सा प्रहरीका अनुसार पोखरीया नगरपालिका वडा नं. ३ बसतपुरबाट ना ७ ख ३९८८ नम्बरको ट्रकमा लोड गरिएको सात हजार किलो छोकडा बरामद भएको छ। यसको बजारमूल्य सात लाख ७० हजार रुपैयाँ रहेको प्रहरीको भनाइ छ।
ट्रकका चालक विजय साह तुरहालाई नियन्त्रणमा लिई बरामद भएको छोकडा, ट्रकलाई आवश्यक अनुसन्धानको लागि वीरगन्ज भन्सार कार्यालय पठाइएको पर्सा प्रहरी प्रमुख सोमेन्द्रसिंह राठौरले बताए।
यस्तै, राति साढे ११ बजे पर्सा छिपहरमाई गाउँपालिका ५ भिष्वाबाट बेवारिसे अवस्थामा खाली खेतमा त्रिपालले छोपिराखेको ६ हजार ९४० किलो छोकडा बरामद गरिएको छ।
७ लाख ६३ हजार ४ सय रुपैयाँ बराबरको छोकडा भन्सार कार्यालयमा पठाइएको छ।
प्रहरीका अनुसार छोकडा मलेसिया तथा सिंगापुरबाट आयात गरिन्छ।
तेस्रो देशबाट आयातित सामग्री पुन: निकासी नपाइने कानुनी प्रावधान छ।
