दोस्रो चरणको चक्रपथ विस्तारको काम थालिएको छ।
पहिलो चरणमा कलंकीदेखि कोटेश्वरसम्म ८ लेनमा विस्तार गरेको सरकारले दोस्रो चरणमा कलंकीदेखि महाराजगञ्जसम्मको ८.५ किलोमिटर भाग पनि सोही अनुसार विस्तार गर्ने सडक विभागले जनाएको छ।
विस्तारको सबै काम चिनियाँ सरकारको सहयोगमा हुनेछ।
चक्रपथ विस्तारमा एक/एक वटा अण्डरपास र ओभरपास बनाउन पनि प्रस्ताव गर्ने विभागले जनाएको छ।
चक्रपथमा पर्ने बालाजु नयाँ बजार चोकमा ओभरपास तथा महाराजगञ्ज चोकमा अण्डरपास बनाउने गरी प्रस्ताव गरिने भएको हो।
८ लेनको चक्रपथमा अण्डरपास तथा ओभरपास भने चार लेनको मात्रै हुने बताइएको छ।
योसँगै विभागले कलंकीदेखि महाराजगञ्जबाट पनि बढाएर गोपीकृष्णसम्म विस्तार गर्ने प्रस्ताव पनि गर्ने बताएको छ।
पहिलो चरणको कलंकीदेखि कोटेश्वरसम्मकै शैलीमा विस्तार गरिने भए पनि यो सडक खण्डमा सुरक्षाका विषय भने सुधार गर्न लागिएको सडक विभाग वैदेशिक सहयोग प्रमुख अर्जुनजंग थापाले बताए।
उनले भने, 'पहिलो खण्डबाट सिक्दै केही सुधार गर्न खोजेका छौं, यो खण्डमा मूल सडकको बीचमा डिभाइडर पनि राखिने छ।'
तर, अहिले सडक विस्तारको सबै डिजाइन बनिनसकेकाले ठ्याक्कै सडक कस्तो हुने, कति अण्डरपास बन्ने, कति आकाशे पुल बन्ने भन्ने भन्न नसकिने थापाले प्रष्ट पारे।
थापाका अनुसार अहिले विभागले उक्त सडक खण्डको साइड क्लियरिङको काम सुरू गरेको छ।
'हामीले कलंकीबाट रूख काट्ने काम सुरू गरेका छौं,' उनले भने, 'अब ३/४ महिनासम्म धेरै रूख काटिनेछ र बिजुलीको पोल सार्ने काम पनि सकिन्छ। त्यसपछि चिनियाँहरू आएर डिजाइनको काम सुरू गर्छन्।'
चक्रपथ विस्तारमा स्वयम्भूको गेटमा रहेको बुद्धको ठूलो मूर्ति पनि हटाउनु पर्ने भएको छ।
थापाका अनुसार दोस्रो चरणको चक्रपथ विस्तारमा बुद्धको मूर्ति र वनस्थली र स्वयम्भूको बीचमा पर्ने १ सय ३२ केभीको विद्युत टावर पनि हटाउनु पर्ने भएको छ।
'विद्युतको टावर हटाउने काम सामान्य विद्युतको लाइन सारेको जस्तो होइन यो प्राविधिक रूपमा पनि जटिल छ, विद्युत प्राधिकरणसँग पनि यसको विषयमा छलफल भइरहेको छ,' उनले भने।
यस्तै, चक्रपथ विस्तारमा महाराजगञ्जको चोकको दुवैतर्फ सडक साँघुरो रहेकाले पनि समस्या भएको छ।
'करिब २ सय ५० मिटरको क्षेत्रमा सडकको नजिकै घरहरू तथा होटल रहेकाले हामीलार्इ आवश्यक भएको जति विस्तार गर्न नमिल्ने भएको छ, त्यसलार्इ मुअब्जा दिएर हटाउने विषयमा पनि छलफल भइरहेको छ,' उनले भने।