सोमबारदेखि सामाजिक सञ्जालमा एउटा भिडिओ भाइरल छ।
एभिन्युज टिभीले प्रसारण गरेको भिडिओमा डोजर र केही मान्छेबीच 'घम्साघम्सी' भएको देखिन्छ।
यो दृश्य बैतडी जिल्ला, दशरथचन्द नगरपालिका-९ ग्वाल्लेकको हो।
त्यहाँ सडक खन्ने क्रममा विवाद भएपछि स्थानीयले ढुंगामुढा गरेको देखिन्छ। मानिसहरू डोजरका अगाडि कराउँदै भौंतारिराखेका छन्। डोजर पनि आफ्नो बल देखाइरहेको छ। विवाद चलिरहेकै बेला सडक खनिरहेको डोजरले एक महिलालाई ठक्कर दिएर कान्लामुनि हुत्याइदिन्छ। स्थानीय गौरी जोशी घाइते भइन्।
सडक खन्ने क्रममा भएको यो अमानवीय व्यवहारलाई लिएर सामाजिक सञ्जालमा विरोध भइराखेको छ। घटनाको भिडिओ भाइरल भएपछि स्थानीय प्रशासनले डोजर चालक सोही नगरपालिका वडानम्बर –२ देहीमाण्डौका किशोर बोहरालाई पक्राउ गरेको छ।
‘पीडित पक्षबाट अहिलेसम्म जाहेरी आएको छैन। तर चालकलाई पक्राउ गरिसकिएको छ,’ जिल्ला प्रहरी कार्यालय बैतडीका प्रहरी नायब उपरीक्षक डिल्लीनारायण पाण्डेयले सेतोपाटीसँग भने, ‘घाइतेहरू उपचार गर्न कोहलपुरतिरका अस्पताल गएका रहेछन्। उनीहरू फर्केपछि जाहेरी देलान्, अनि थप कारबाही सुरू गर्छौं।’
पक्राउ परेका चालक बोहराले प्रहरीसँगको प्रारम्भिक बयानमा आफूमाथि स्थानीयले ढुंगामुढा गरेको उल्लेख गरेका छन्।
‘एक्कासि ढुंगा हानाहान गरे। मलाई पनि लाग्यो,’ उनले दिएको बयानलाई उद्धृत गर्दै पाण्डेयले भने, ‘त्यसपछि के भयो थाहा पाइनँ।’
सुण्नाखानदेखि पार्ससम्म सडक निर्माणका क्रममा गाउँका दुई पक्षबीच खन्ने कि नखन्ने विवाद चलिरहेकै थियो। सडक निर्माण गर्न खोजिएको जग्गा गुठीको भएकोले त्यहाँबाट बनाउने र बनाउन नहुने विषयमा विवाद चर्किएपछि गत शनिबार प्रहरी गएर छलफल नै गरिएको थियो।
प्रमुख जिल्ला अधिकारी आनन्द पौडेलका अनुसार शनिबार छलफलपछि सडक खन्ने सहमति भएको थियो। तर सोमबार फेरि सहमति तोडिएपछि झडप भएको उनले बताए।
‘बाटो खन्ने सहमति भएको हो। विवाद बढेपछि झडप भएको रहेछ। घटनास्थलमा प्रहरी पठाइसकिएको छ,’ उनले सेतोपाटीसँग भने।
घटनामा ढुंगा हानाहान हुँदा दुवै पक्षका मान्छे घाइते छन्। सडक खन्न दिन हुँदैन भन्ने पक्षका गौरी जोशी र सुरेन्द्र जोशीको धनगढीमा उपचार भइराखेको प्रहरीले जनाएको छ।
यस्तै सडक खन्नुपर्छ भन्ने पक्षका सन्तोष जोशी, पुष्कर जोशी, दिनेश जोशी, भोजराज जोशी, नारायण जोशी र धर्मानन्द जोशी सामान्य घाइते छन्। उनीहरू उपचारपछि घर फर्किसकेको प्रहरीले जनाएको छ।