संसारकै सबभन्दा पुरानो मोती आबुधावीको लुभ्र संग्रहालयमा प्रदर्शन गरिने भएको छ। अक्टोबरमा प्रदर्शन गरिने यो मोती फेला परेपछि अहिलेसम्म सार्वजनिक गरिएको थिएन। सर्वसाधारणले हेर्न पाउने सुविधा पहिलोपटक दिइएको हो।
सिएनएनका अनुसार यो मोती ८ हजार वर्ष पुरानो हो। यो आबुधावीको मरवा टापूमा भेटिएको युएइको संस्कृति तथा पर्यटन विभागले जनाएको छ।
पुरातत्वविदहरूले यो मोती इसापूर्व ५८०० र ५६०० को बीचमा बनेको अनुमान गरेका छन्। सन् २०१७ मा फेला परेको यो मोती एक सन्टिमिटरको एक तिहाइभन्दा पनि सानो छ। हलुका गुलाबी रङको यो मोती लुभ्र संग्रहालयमा अक्टोबर ३० देखि सार्वजनिक गरिनेछ।
संस्कृति तथा पर्यटन विभागको पुरातत्व खोज एकाइका निर्देशक अबदुल्ला खलफन अल-काबीले यति पुरानो मोती भेटिनुले ढुंगे युगमा पनि मान्छेले मोतीको कारोबार थालिसकेका थिए भन्ने अनुमान गर्न सकिएको बताएका छन्।
प्राचीन र ऐतिहासिक ठाउँहरूले पनि आबुधावी मोतीकै लागि प्रख्यात थियो भन्ने पुष्टि गरेका छन्। १६ औं शताब्दीदेखि यहाँ कारोबार चुलिएको पनि बताइन्छ। कुनै बेला यहाँको मुख्य आय नै मोती भएको तर १९ औं शताब्दीदेखि कारोबार घट्दै गएको विभागद्वारा जारी विज्ञप्तिमा उल्लेख छ।