बाराको महागढीमाई नगरपालिका वडा नम्बर २ बरियापुरका मुकेश कुसवाहले सोमबार बिहान ७ बजे मेयर उपेन्द्रप्रसाद यादवलाई फोन गरे।
नगरपालिकाले समयमै नाला निर्माण नगर्दा सडकमा पानी जमेको गुनासो उनले मेयरलाई सुनाए। मुकेशले फोन गरेको दुई घण्टापछि मेयर यादव नाला निरीक्षण गर्न पुगे।
मेयर आएपछि स्थानीय बासिन्दाहरू पनि भेला भए। नाला बनाउन ४० लाख बजेट आए पनि समयमै काम नभएकोमा स्थानीय बासिन्दाले मेयरसमक्ष आक्रोश पोखे। मेयर र स्थानीयबीच चर्चाचर्की नै भयो। यसको भिडिओ स्थानीय एक युवाले खिचेर फेसबुकमा पोस्ट गरिदिए।
स्थानीयसँग कुराकानी गरेपछि मेयर नगरपालिका कार्यालय गए। उनले नगर प्रहरीलाई मुकेशलाई खोजेर ल्याउन निर्देशन दिए। नगर प्रहरीहरू मुकेशलाई खोज्दै घर गए, तर भेटेनन्। उनका बाबु खेतमा छन् भन्ने थाहा पाएपछि उतै लागे।
मुकेशका बाबु हरेन्द्र महतो खेतमा काम गरिरहेका थिए। नगर प्रहरीले मुकेशलाई नभेटेपछि उनका बाबु हरेन्द्रलाई नगरपालिका लगे।
‘खेतमा काम गरिरहनुभएका बालाई नगर प्रहरीले अपशब्द बोल्दै भ्यानमा राखेर लगेका हुन्,’ मुकेशका भाइ सिकेन्द्रकुमारले सेतोपाटीसँग भने, ‘नगरपालिका पुगेपछि बालाई मेयरले मुकेश कहाँ छ भनेर सोधेछन्।’
अरूले लगाएको जुत्ता मेयरले आफ्ना बाबु हरेन्द्रको टाउकोमा राख्न लगाए सिकेन्द्रकुमारको आरोप छ।
‘तर बुवाले मान्नुभएन। त्यसपछि शौचालयमा लगेर १५/२० मिनेट थुनिदिएछन्,’ सिकेन्द्रले भने, ‘मुकेशले केही गल्ती गरेको भए उसलाई कानुनअनुसार कारबाही गर्नुपर्ने, तर कुनै गल्ती नै नभएका बालाई कारबाही गरेछन्। मुकेशले पनि नाला निर्माण समयमै गर्नुपर्यो भनेको हो, कुनै अपराध गरेको होइन।’
शौचालयबाट निकालेपछि हरेन्द्रलाई मेयरले आफ्नो घरमा लगेको र बेलुकी ८ बजेतिर मात्रै छाडिदिएको उनले बताए।
सेतोपाटीको सम्पर्कमा आएका मुकेशले नगर प्रहरी आफूलाई खोजी गर्दै गाउँ आएकोले सोमबार आफू घर नै नगएको बताए। ‘जहाँ भेट्यो त्यहीँ मलाई नगर प्रहरीले पिट्न सक्छ त्यसैले म हिजो घर नै गइनँ,’ उनले भने, ‘नाला समयमै निर्माण गर्नुपर्यो भन्ने माग गरेको हुँ।’
मेयर यादवले भने हरेन्द्रका परिवारले लगाएको आरोप निराधार भएको बताए।
‘मैले मुकेशबारे बुझ्न उनका बाबुलाई कार्यालयमा बोलाएको हुँ,’ मेयर यादवले भने, ‘कार्यालय समयमै बोलाएको हुँ। कुटपिट र शौचालयमा थुनेको छैन। यो सरासर झुट कुरा हो। अहिले मात्र होइन उसले (मुकेश) ले दुई वर्षदेखि कहिले फेसबुकमा मेरो फोटोमा टाउको काटेर हाल्ने त कहिले के गर्ने गरिराख्छ। नालाबारे भएको छलफलको भिडिओ पनि उसैले राखेको हो कि भनेर सोधपुछ गर्न उसका बाबुलाई बोलाएको हो।’
जिल्ला प्रहरी कार्यालय बाराका प्रहरी निरीक्षक विकासराज खनालले मेयरविरूद्ध कुनै उजुरी नपरे पनि मेयर यादवले भने एक जना विरूद्ध गाली बेइज्जति मुद्दा दिएको जानकारी दिए।
प्रहरीले मेयरविरूद्ध फेसबुकमा अनावश्यक लेखेको आरोपमा स्थानीय २७ वर्षीय दीपेन्द्र कुसवाहलाई मंगलबार पक्राउ गरेको छ। यसपालि नाला निरीक्षणको क्रममा स्थानीयसँग भएको चर्चाचर्कीको भिडिओ नक्कली एकाउन्ट बनाएर दीपेन्द्रले नै पोष्ट गरेको प्रहरीको आशंका छ।