रुघाखोकी, ज्वरो र घाँटी दुख्ने जस्ता कोरोनाको संक्रमणसँग मिल्दोजुल्दो लक्षण देखिएका बिरामीलाई कतिपय अस्पताल र चिकित्सकहरूले उपचार नगरी फर्काइएका समाचार आइरहेका बेला पाल्पामा भने त्यस्तै लक्षण देखिएका बिरामीलाई जनप्रतिनिधि आफैंले अस्पतालबाट घर पठाइदिएका छन्।
तानसेन नगरपालिका वडा नं. ६ का एक जना पुरुष एक हप्ता पहिले भारतको लखनउबाट आई घरमा बस्दै आएका थिए।
शनिबार ज्वरो आउने, घाँटी दुख्ने भएपछि जिल्ला अस्पताल पाल्पा पुगेका उनलाई प्रदेशसभा सदस्य पुरन बज्राचार्यले सामान्य परीक्षण र स्वाब संकलन नगरिकनै घरमै सेल्फ क्वारेन्टाइनमा बस्न पठाएको भन्दै चिकित्सकहरूले असन्तुष्टि जनाएका छन्।
‘बिरामीको ट्राभल हिस्ट्री र उनमा देखिएको लक्षणलाई हेर्दा ल्याब रिपोर्ट नआउँदासम्म आइसोलेसनसहितको अस्पतालमा बसी उपचार गर्नुपर्ने देखिए पनि माननीय आफैं आएर रुघाखोकी मात्रै हो, केही हुँदैन भन्दै घरमा फिर्ता लैजानुभयो,’ एक चिकित्सकले भने।
एक साताअघि भारतबाट आएका पाँच जना शनिबार बिहान अस्पतालमा आफैं जचाउन आएकोमा एक जनामा ज्वरो र घाँटी दुखेको लक्षण थियो। बिरामीको परीक्षणको लागि स्वाब लिन समेत नपाई सांसदको दबाबमा घर लगिएपछि अहिले अस्पतालमा कार्यरत चिकित्सकहरू तनावमा रहेका छन्।
‘कामना गरौं उहाँलाई केही नभएको होस्, तर कतै कोरोना संक्रमण रहेछ भने उहाँमात्र होइन, परिवार र सिंगो पाल्पा समेत संक्रमित हुन सक्छ यसको जिम्मा कसले लिने?’, अस्पताल स्रोतले भन्यो।
नेपाल बाहिर जुनसुकै मुलुकबाट आएका व्यक्तिहरूमा कुनै लक्षण देखा नपरे पनि १४ दिनसम्म सेल्फ क्वारेन्टाइन वा सरकारले बनाएको क्वारेन्टाइनमा राख्ने नीति अवलम्बन भएको बेला आइसोलेसनमा राख्नुपर्ने बिरामीलाई सांसदले नै घर फिर्ता लिएर जानु गैरजिम्मेवारपूर्ण कार्य भएको चिकित्सक बताउँछन् ।
‘भारतमा कोरोनाका संक्रमित बढिरहेको बेला त्यहीँ स्थानबाट आएका व्यक्तिलाई ज्वरो र घाँटी दुखेको अवस्थामा परीक्षण गर्न नदिई सांसदले नै घरमा बस्ने भन्दै फिर्ता लिएर जानुहुन्छ भने हामीले कसरी उपचार गर्ने’, एक चिकित्सकले भने।
सांसद बज्राचार्य आफैं पनि चिकित्सक हुन्।
‘म आफू पनि चिकित्सक हुँ, प्रदेश सरकारले पाल्पाको लागि तोकेको कोरोना उपचार तथा नियन्त्रण समितिको संयोजक हुँ, केही हुँदैन भनेर झगडा गरेपछि हाम्रो केही उपाय लागेन’, अस्पताल स्रोतले भन्यो।
सांसद बज्राचार्यले भने आफूले दवाब दिएको नभई बिरामीले आफैं घर जान्छु भनेकोले पठाइदिनुस् मात्र भनेको बताए।