मन्त्रिपरिषदको आज सम्पन्न बैठकले समस्यामा परेका गरिब मजदुरको जीवन रक्षाको लागि खानाको व्यवस्था प्रदेश सरकारको तर्फबाट गर्ने निर्णय भएको सरकारका प्रवक्ता एवं आन्तरिक मामिला तथा कानून मन्त्री ज्ञानेन्द्र कुमार यादवले जानकारी दिए।
यसको व्यवस्थापन स्थानीय तहसँग समन्वय गरेर तत्कालको लागि महानगरलाई २५ लाख, उपमहानगरलाई २० लाख, नगरपालिकालाई १५ लाख र गाँउपालिकालाई १० लाखको दरले रकम पठाइने भएको छ।
यसका साथै कोरोनाको उपचारमा खटिने चिकित्सकको जीवन बीमा गरिनुका साथै सत प्रतिशत प्रोत्साहन भत्ता समेत दिइने भएको छ।
सरकारले कोरोना रोकथामका लागि हालसम्म गरेको प्रयास र अगामी दिनमा लिने नीति बारे जानकारी गराउन सर्वदलीय बैठक समेत बोलाएको थियो।
सर्वदलीय बैठकमा मुख्यमन्त्री लालबाबु राउत सहितका मन्त्रीहरु, काँग्रेस संसदीय दलका नेता राम सरोज यादव, नेकपाका नेताहरु शत्रुधन महतो, किशोरी साह लगायत मन्त्रालयका सचिव समेतको सहभागिता थियो।
