सरकारले देशभर लकडाउन घोषणा गर्दा बाहिरबाट आउनेहरुलाई १४ दिन अनिवार्य क्वारेन्टाइनमा बस्न आग्रह गरेको छ।
तर भारत तथा तेस्रो मुलुकबाट आएका अधिकांशले सरकारको यो आग्रहलाई वेवास्ता गर्दै खुलेआम गाउँघर डुल्दै आएका छन्।
चैतको पहिलो सातामा सीमा नाकामा हेल्थ डेस्क स्थापनापछि २ लाख बढी नेपाली नागरिक प्रदेश ५ का विभिन्न सीमाबाट नेपाल छिरेको प्रदेश प्रहरी प्रमुख नरबहादुर केसी बताउँछन्।
केसीका अनुसार प्रदेशका विभिन्न जिल्लामा निर्माण गरिएका क्वारेन्टाईनमा भने जम्मा ५ सय मात्रै छन्।
प्रदेश ५ को अस्थायी मुकाम रुपन्देहीमा ५२ जना सहित प्रदेशभर ५ सयलाई क्वारेन्टाइनमा राखिएको छ। प्रदेशमा १३ जनालाई आइसोलेसनमा राखेर उपचार गरिएको छ।
प्रदेश ५ का १२ जिल्लामा १ सय ९० स्थानमा २ हजार ३ सय बेडका क्वारेन्टाइन बनाइएको छ। रुपन्देहीका १६ स्थानीय तहमा ३ सय ५४ शैय्याको क्वारेन्टाइन तयार छन्।
प्रदेशको सामाजिक विकास मन्त्रालयका अनुसार नवलपरासीमा १४, पाल्पामा २३, अर्घाखाँचीमा ३४, प्युठानमा १६, बर्दियामा १९ र कपिलवस्तुमा १६ स्थानमा क्वारेन्टाइन बनाइएको छ। त्यसैगरी गुल्मीमा २६, बाँकेमा ८, दाङमा १६, रोल्पामा १ तथा रुकुम पूर्वमा २ स्थानमा क्वारेन्टाइन तयार भएका छन्।
प्रदेश ५ सरकारले ४ सरकारी अस्पताललाई आइसोलेसन अस्पताल बनाउने निर्णय गरेअनुरुप बुटवल र भैरहवामा एकएक र दाङ तथा नेपालगञ्जमा एकएक अस्पतालले यो सेवा सुरु गरिसकेका छन्। विशेष अस्पताल र दुई स्थानमा परीक्षण गर्ने ल्याब तत्काल व्यवस्था गरिने प्रदेश सरकारले जनाएको छ।
हालसम्म कोरोना भाइरसको आशंकामा प्रदेश नंं ५ मा ५२ जनाको स्वाब संकलन गरिएको छ। प्रदेश ५ का स्वास्थ्य निर्देशक डा. विनोद गिरीले अहिलेसम्म प्रदेश ५ का विभिन्न अस्पतालमा ७७ जना कोभिड १९ को संक्रमणको आशंकामा अस्पताल पुगेको र त्यसमध्ये ५२ जनाको स्वाब संकलन गरिएको जानकारी दिए।
त्यसमध्ये २५ जनाको रिपोर्ट नेगेटिभ आएको र अझै २७ जनाको रिपोर्ट आउन बांकी रहेको गिरीले बताए। आशंकितमध्ये १३ जनालाई विभिन्न अस्पतालका आइसोलेसनमा राखेर उपचार गरिरहेको उनले जानकारी दिए।