स्वास्थ्य मन्त्रालयले अहिलेसम्म जम्मा ११ सय ४५ जनामा कोरोनाभाइरसको परीक्षण गरिएको जनाएको छ। तीमध्ये ११ सय ४० जनाको नतिजा नेगेटिभ आएको छ भने पाँच जनामा पोजेटिभ आएको छ।
बुधबारसम्म राष्ट्रिय जनस्वास्थ्य प्रयोगशालाबाट गरिएका ११ सय ४५ परीक्षणमध्ये ११ सय ४० को रिपोर्ट नेगेटिभ आएको बुधबार पत्रकार सम्मेलनमा स्वास्थ्य मन्त्रालयका प्रवक्ता विकास देवकोटाले बताए।
उनका अनुसार नयाँ कुनै कोरोना संक्रमित बिरामी फेला परेको छैन।
स्वास्थ्य मन्त्रालयका अनुसार हालसम्म पाँच जनामा कोरोनाभाइरसको संक्रमण देखिएको छ। त्यसमध्ये चार जना आइसोलेसनमा रहेको र एक जना उपचारपछि घर फर्किसकेका छन्।
विश्वभर अहिले ७ लाखभन्दा बढी कोरोना संक्रमित छन्। त्यस्तै एक लाख बढी उपचारपछि घर फर्किसकेका छन्।