भक्तपुरस्थित खरिपाटी क्वारेन्टाइनमा रहेका ९६ जनाकै कोरोना परीक्षण हुने भएको छ।
शुक्रबार स्वास्थ्य मन्त्रालयका प्रवक्ता डाक्टर विकास देवकोटाले परीक्षणको लागि सबैको स्वाब लिइएको जानकारी दिए।
विभिन्न संक्रमित देशहरूबाट आएका ९६ नेपालीलाई खरिपाटीस्थित विद्युत प्राधिकरणको तालिम केन्द्रमा राखिएको छ।
उनीहरूको परीक्षण नेगेटिभ आएपछि मात्र घर पठाउने सरकारको तयारी छ।
यसअघि पनि खरिपाटीमा चीनको वुहानबाट १ सय ७५ जनालाई राखिएको थियो।
प्रवक्ता देवकोटाले पोखरामा एउटा पोजेटिभ देखियो भनेर समाचारमा आएको कुरा गलत रहेको बताए।
उनले पोर्टेवल पिसिआरबाट गरिएको सुरूआती परीक्षणलाई प्रमाणीकरणको लागि अन्य ल्याबमा पठाउनुपर्ने रहेको जनाए।
यसअघि राष्ट्रिय जनस्वास्थ्य प्रयोगशालाकी निर्देशक डा. रूना झाले सुरूआती परीक्षणलाई क्रसचेकको लागि प्रयोगशालामा पनि परीक्षण गरिने बताएकी थिइन्।