कोरोनाभाइरस आशंकामा प्रदेश दुईमा १ सय ३ वटा स्वाब नमुना परीक्षण गरिएको छ। परीक्षण गरिएकामध्ये ४० जनाको रिपोर्ट निगेटिभ आएको छ भने ६३ जनाको रिपोर्ट आउन बाँकी छ।
प्रदेश २ मा कोरोनाभाइरस संक्रमणको आशंकामा अहिलेसम्म विभिन्न जिल्लामा निर्माण गरिएका २ हजार ९ सय १८ बेड क्षमताका १ सय ४२ क्वारेन्टाइनमा ८ सय ६५ जना शंकास्पद व्यक्तिलाई राखिएको स्वास्थ्य निर्देशनालयका वरिष्ठ जनस्वास्थ्य प्रशासक विजय झाले जानकारी दिए।
प्रदेशमा अहिले १ हजार ८० व्यक्ति होम क्वारेन्टाइनमा छन्। आइसोलेसन वार्डमा २७ जनालाई भर्ना गरिएको उनले बताए।
प्रदेश स्वास्थ्य निर्देशनालयका अनुसार रौतहटमा ६ सय १८ बेड संख्याको १६ वटा क्वारेन्टाइन बनाइएको छ। जहाँ २ सय ५ जनालाई राखिएको छ। २४ जना होम क्वारेन्टाइनमा छन्। ९ बेड क्षमताको आइसोलेसन वार्डमा अहिले कुनै शंकास्पद बिरामी छैनन्।
बारामा ४ सय ४ बेड क्षमताका १४ क्वारेन्टाइनमा अहिलेसम्म ५० जनालाई राखिएको छ। बारा जिल्लास्थित कलैया अस्पतालमा निर्माण गरिएको २० वटा आइसोलेसन बेडमा अहिले ९ जना शंकास्पद बिरामीलाई राखिएको झाले जानकारी दिए। बारामा अहिले २५ जना होम क्वारेन्टाइनमा छन्।
पर्सामा १ सय ९६ बेड क्षमताको १२ वटा क्वारेन्टाइन बनाइएको छ। त्यहाँ ६३ जना छन्। ५२ जना होम क्वारेन्टाइनमा छन्। पर्साको वीरगञ्जस्थित नारायणी अस्पतालमा बनाइएको ८ बेडको आइसोलेशन वार्डमा अहिले ५ जना शंकास्पद बिरामीलाई राखिएको छ।
सप्तरीमा ५ सय ४० बेड क्षमताको ३१ वटा क्वारेन्टाइनमा अहिले २ सय ६४ जनालाई निगरानीमा राखिएको छ भने ५६ जना होम क्वारेन्टाइनमा छन्। राजविराजस्थित गजेन्द्र नारायण सिंह सगरमाथा अस्पतालमा रहेको ९ वटा आइसोलेसन वार्डमा अहिले एकजना शंकास्पद बिरामीलाई भर्ना गरिएको उनले बताए।
सिराहामा २ सय ४६ बेड क्षमताको १७ वटा क्वारेन्टाइन निर्माण गरिएकोमा अहिले १ सय २० जना छन्। होम क्वारेन्टाइनमा ७७ जना छन्। उक्त जिल्लामा १३ बेडको आइसोलेसन रहेकोमा अहिलेसम्म कुनै पनि शंकास्पद बिरामी छैनन्।
धनुषामा ३ सय २६ बेड क्षमताको १६ वटा क्वारेन्टाइनमा अहिले ८२ जनालाई राखिएको झाले जानकारी दिए। यस जिल्लामा अहिले ४० जनालाई होम क्वारेन्टाइनमा पठाइएको उनले बताए। प्रादेशिक अस्पताल जनकपुरमा १२ बेडको आइसोलेसन रहेकोमा १२ जना शंकास्पद बिरामीलाई राखिएको छ।
त्यस्तै महोत्तरीमा ३ सय ७ बेड क्षमताको १६ वटा क्वारेन्टाइन बनाइएको छ। त्यहाँ अहिलेसम्म ५२ जनालाई राखिएको छ। ७ सय ७४ जनालाई होम क्वारेन्टाइनमा पठाइएको छ भने क्वारेन्टाइनमा महोत्तरीमा १४ वटा आईसोलेसन वार्ड निर्माण गरिएपनि अहिले कुनैपनि शंकास्पद बिरामी नआएको उनले बताए।
सर्लाही जिल्लामा २ सय ८१ बेड क्षमताको २० वटा क्वारेन्टाइनमा अहिले २९ जना छन् भने ३२ जनालाई होम क्वारेन्टाइनमा पठाइएको छ। दुईवटा आइसोलेसन वार्ड निर्माण गरिएपनि कुनैपनि शंकास्पद बिरामी आएका छैनन्।
यता प्रादेशिक अस्पताल जनकपुरमा रहेको आइसोलेसन बेडमा कोरोनाका शंकास्पद बिरामीहरु बढिरहेकाले बेडको संख्या थप्नुपर्ने आवश्यकता रहेको अस्पतालका मेडिकल सुपरिटेन्डेन्ट डा.नागेन्द्र यादवले बताए।