जनकपुरधाम उपमहानगरपालिका वडा नम्बर ४ माछा बजारकी राधा देवीको श्रीमानको मृत्यु गत सोमबार निधन भयो।
सरकारले जारी गरेको लकडाउनका कारण राधाको श्रीमानको मृत्यु हुँदा उनको मलामी जान समेत कोही तयार भएनन्, अन्त्यमा उनको देवर दिलीप साह, भाइ रमेश साहले शव बोकी समसानघाटसम्म पुर्याए।
श्रीमानसँगै चिया पसल गर्दै गुजारा चलाउँदै आएकी ५५ वर्षीया राधाको कोही सन्तान छैनन्।
त्यसैले उनी आफैंले दागबत्ती दिइन्।
राधाले भनिन्, ‘श्रीमानको मृत्युपछि उनको दाहसंस्कारमा सामिल हुन समाजलाई आग्रह गरेको थिएँ तर कोही पनि तयार भएनन् अन्त्यमा मेरो देवर दिलीप साह र भाइ रमेश साह मिलेर जसोतसो गरी समसानघाटसम्म पुर्याए त्यसपछि मैले नै दागबत्ती दिएँ।’
राधाबाट बच्चा नभएपछि उनका श्रीमानले दोस्रो विवाह गरेका थिए। कान्छी श्रीमतीबाट दुई छोरी र एक छोरी थिए। तर कान्छीले अर्कैसँग विवाह गरेर गइन्। त्यसपछि ती बच्चा उनको लागि न बूढेसकालका सहारा बने न नै मर्नेबेला दागबत्ती दिए।
दाहसंस्कारका लागि केही युवाले आर्थिक सहयोग जुटाइदिएको राधाले बताइन्।
श्रीमान बितेपछि उनको परिस्थितिबारे थाहा भएपछि आफूहरूले सकेजति आर्थिक सहयोग जुटाइदिएको युवा अभियानी राकेशविक्रम साहले बताए।