दैलेखको दुल्लुस्थित विद्युत प्राधिकरण क्वारेन्टिनमा बसेकाहरुले घर जान पाउनुपर्ने माग राख्दै नाराबाजी गरेका छन्।
दुल्लु नगरपालिकाका प्रमुख प्रशासकीय अधिकृत ज्ञानमणी नेपालका अनुसार क्वारेन्टिनमा बसेको १५ दिन पुगेका व्यक्तिहरूले घरजान पाउँ भन्दै नाराबाजी गरेपछि सम्झाइबुझाइ गर्न प्रहरी पठाइएको छ।
उनका अनुसार, प्राधिकरणको क्वारेन्टाइनमा भारतको मुम्बइ र गुजरातबाट आएका ८९ जना राखिएको छ। जसमध्ये ८ जनामा कोरोना संक्रमण देखिएको थियो।
‘सँगै क्वारेन्टिनमा बसेकाहरूमा कोरोना देखिएपछि अरू आत्तिएका छन्, यही क्वारेन्टिनमा केही समय अघि एकजनाको मृत्युसमेत भएको थियो त्यसैले उनीहरू आत्तिएर होहल्ला गरेका हुन्,’ उनले भने, ‘अहिले त्यहाँ भीड र नाराबाजी नियन्त्रण गर्न प्रहरी पठाइएको छ, म पनि जाँदै छु।’
१५ दिन पुगेकाहरूलाई घर पठाउनु अघि स्वाव परीक्षण गर्न पठाइएकोमा अहिलेसम्म रिपोर्ट आएको छैन। रिपोर्ट आउन ढिलो भएपछि क्वारेन्टिनमा बसेकाहरूले यत्तिकै घर जान पाउँ भनेर नाराबाजी गरेको नेपालले बताए।
जुम्लाको कर्लाणी स्वास्थ्य विज्ञान प्रतिष्ठानमा दुल्लु नगरपालिकाबाट २ सय स्वाव परीक्षणका लागि पठाइएको थियो। प्रतिष्ठानले भने पहिलै ११ सय भन्दा बढी स्वाब परीक्षणका लागि क्यूमा भएको जनाएको छ। प्रतिष्ठानले दिनमा २ सयमात्र स्वाव परीक्षण गर्न सक्छ।
अहिले दुल्लु नगरपालिका भरीका ४० वटा क्वारेन्टिनमा भारतबाट आएका २ हजार ५ सय व्यक्तिलाई राखिएको छ।