‘कोरोना संक्रमित सुत्केरीले शिशुलाई स्तनपान गराउँदा खतरा हुन्न’

सेतोपाटी संवाददाता

झापा, भदौ २९

सुत्केरी हुन नोबेल अस्पताल विराटनगरमा पुगेकी झापाकी एक महिलामा कोरोना संक्रमण पुष्टि भयो।

शिवसताक्षी ५ सालमाराकी २३ वर्षीया महिलालाई कोरोना संक्रमण देखिएको थियो।

उनी छ दिनअघि सुत्केरी गराउन नोबेल अस्पताल विराटनगर गएकी थिइन्।

कोरोनाको संक्रमण देखिए पनि उनले स्वस्थ शिशुलाई जन्म दिइन्।

शिवसताक्षी नगरपालिकाका स्वास्थ्य शाखाका कर्मचारी सञ्जय ठकुरीका अनुसार आमा र शिशु दुवैको स्वास्थ्य सामान्य छ।

उनीहरू सालमारास्थित आफ्नै घरको आइसोलेसनमा बसेको ठकुरीले जानकारी दिए।

ती महिला २१ गते दमकको ओम मेची अस्पतालमा स्वास्थ्य परीक्षणका लागि गएकी थिइन्।

स्वास्थ्य अवस्था सामान्य रहेकाले अस्पतालले उनलाई २७ गते बोलाएको थियो। तर, शरीरमा रक्तचाप बढेपछि उनी नोबेल अस्पतालमा २४ गते भर्ना हुन गइन्। त्यो बेला उनलाई प्रशव पीडाले छोइसकेको थियो।

अस्पतलाले उनलाई २५ भदौमा सुरक्षित सुत्केरी गरायो। नोबेल अस्पतालले ती सुत्केरी महिलाको २६ गते स्वाव संकलन गर्‍यो। २७ गते उनको पिसिआर रिपोर्ट ‘पोजेटिभ’ आयो।

नोबेल अस्पतालले सुत्केरी महिला र नवजात शिशुको स्वास्थ्य सामान्य रहेको ठानेपछि २८ गते घर पठायो।

अस्पताल रहुञ्जेल आमा र उनले जन्माएको नवजात शिशु एउटै बेडमा थिए। जनस्वास्थ्य विज्ञ डाक्टर बालकृष्ण साहका अनुसार सुत्केरी आमाको पिसिआर पोजेटिभ भए पनि नवजात शिशु काखमा लिन र स्तनपान गराउँदा कुनै समस्या हुँदैन।

उनले भने, ‘कोरोना संक्रमित आमाले स्तनपान गराउँदा नवजात शिशुलाई सामान्यतया पातलो दिसा जानेबाहेक अन्य ठूलो असर गर्दैन।’

विश्व स्वास्थ्य संगठनले आमामा कोरोना पुष्टि भए पनि स्तनपान गराउँदा नवजात शिशुमा आमाको संक्रमण सर्ने सम्भावना ज्यादै कम भएको बताउँदै आएको छ।

‘संक्रमण सर्ने भयले स्तनपान नगराएका कारण बरु शिशुको ज्यान जोखिममा हुन्छ’, डाक्टर साहले भने, ‘आमा र परिवारका सदस्यले सुत्केरी महिलालाई हौसला प्रदान गरेर नवजात शिशुसँगै राखेर स्तनपान गराउँदा आमा र शिशुको स्वास्थ्यमा जोखिम हुँदैन।’

संक्रमित सुत्केरी आमाले मास्क अनिवार्य लगाउने, तातोपानी नियमित पिउने र पोसिलो खानेकुरा खाए कोरोना जित्न सकिने चिकित्सकले बताएका छन्।

नेपालमा झापा लगायत सुनसरी, चितवन, नेपालगञ्ज, काभ्रेपलाञ्चोक लगायतका जिल्लामा सुत्केरी आमालाई कोरोना पुष्टि भए पनि शिशुको रिपोर्ट नेगेटिभ आएको उदाहरण दिँदै साहले भने, ‘कोरोनाको संक्रमण देखिँदैमा सुत्केरीले आत्तिनु पर्दैन।’

प्रकाशित मिति: सोमबार, भदौ २९, २०७७ ०१:३९

सिफारिस