कोरोना महामारीले ६ महिना बढी बन्द भएको भारतको आग्रास्थित ताज महल खुलेको छ।
कोरोना भाइरसको महामारीलाई नियन्त्रण तथा न्यूनीकरण गर्न भारत सरकारले गत मार्चदेखि देशव्यापी लकडाउन गरेको थियो।
लकडाउनपछि बन्द भएको पर्यटकीयस्थल ताजमहल ६ महिनापछि खुलेको हो। बिबिसीका अनुसार यति लामो समयसम्म बन्द भएको यो पहिलो पटक हो। ताजमहल खुले पनि सोमबार भ्रमण गर्न आउनेहरूको संख्यामा भने कमी थियो।
लकडाउनअघि भ्रमण गर्न आउनेको घुइँचो हुने गर्थ्यो। तर अहिले सो संख्यामा कमी आएको छ।
ताजमहल प्रवेश गर्नुअघि केही सुरक्षाका उपायहरू अपनाउनु पर्नेछ। प्रवेश गर्नुअघि त्यहाँ अनिवार्य तापक्रम जाँच हुन्छ।
त्यस्तै, डिजिटल टिकेटिङको व्यवस्था गरिएको छ भने सामूहिक तस्वीर खिच्न मनाही गरेको छ। 'सेल्फी' खिच्न भने पाइने बिबिसीले जनाएको छ।
अहिलेको अवस्थामा त्यहाँ पाँच हजार जनालाई मात्र प्रवेश गर्न दिइनेछ। १७ औं शताब्दीमा मुघल सम्राट शाह जहानले आफ्नी रानीको सम्झनामा ताज महल बनाएका थिए।
