बेल्जियमका पूर्व राजा अल्बर्ट द्वितीयकी प्रेमिकाबाट जन्मेकी छोरी डेल्फिन बउललाई अदालतको आदेशपछि शाही पदवी प्रदान गरिएको छ।
उनलाई राजाकी विवाहिता पत्नीबाट जन्मिएका अन्य तीन सन्तान सरहको अधिकार प्रदान गर्दै शाही पदवी प्रदान गरिएको हो।
आदेशपछि ५२ वर्षीय डेल्फिनले 'बेल्जियमकी राजकुमारी'को उपाधि पाएकी छन्।
राज अल्बर्टले यस वर्षको जनवरीमा डेल्फिनको बाबु भएको स्वीकार गरेका थिए। डेल्फिनलाई यो अधिकार एक दशक बढी लामो कानुनी लडाईंपछि प्राप्त भएको हो। उनकी आमाले अल्बर्ट राजा हुनुभन्दा अगाडि १८ वर्ष लामो सम्बन्ध रहेको दाबी गरेकी थिइन्।
यस बारेमा पहिलोपटक सन् १९९९ मा प्रकाशित भएको अल्बर्टकी श्रीमतीको जीवनीमा पहिलोपटक खुलासा भएको थियो। यध्यपी सो जीवनी अल्बर्टकी श्रीमती रानी पाओलाको आधिकारिक जीवनी भने थिएन।
डेल्फिनले सन् २००५ मा पहिलोपटक अल्बर्ट आफ्ना बाबु भएको एक अन्तरवार्तामार्फत खुलासा गरेकी थिइन्।
त्यसपछि सन् २०१३ मा अल्बर्टले राजपाठ त्याग गरेपछि उनलाई आफ्नो अधिकारका लागि कानुनी लडाईं सुरू गर्ने बाटो खुलेको थियो।
राजपाठ त्याग गरेपछि अल्बर्टले राजाका हैसियतमा पाउँदै आएको कुनै पनि मुद्धाविरूद्धको कानुनी उन्मुक्तीबाट विमुख भएपछि डेल्फिन लाई आफ्नो अधिकारका लागि लड्ने सजिलो भएको थियो।
अदालतको निर्णयपछि डेल्फिनका वकिलले पत्रकारहरूसँग अदालतको निर्णयले उनी खुशी भएको प्रतिक्रिया दिएका थिए।
अदालतको निर्णयले डेल्फिन र उनका दुई सन्तानले उनका बाबुको थर कायमै राख्न पाउने भएका छन्।
योसँगै अब डेल्फिनलाई अल्बर्टको निधनपछि उनको सम्पतिमा उनका विवाहिता पत्नीबाट जन्मेका अन्य तीन सन्तान सरह समान हक पाउनेछिन्।
शाही उपाधि पाएपनि उनले सोका बापत कुनै पनि शाही आर्थिक सहयोग भने पाउनेछैनिन्। तर अल्बर्टले मुद्दा लड्दा डेल्फिनले खर्च गरेको ३४ लाख युरो रकमको भने शोधभर्ना गर्नुपर्नेछ।
उनकी आमाले राजा अल्बर्टसँग सन् १९६६ देखि ८४ सम्म सम्बन्धमा रहेको र डेल्फिन सानै हुँदाका बखत सँगै रहने गरेको बताएकी छन्।
सन् १९९३ मा आफ्ना ठुल्दाजुको निधन भएपछि अल्बर्ट अनपेक्षित रूपमा बेल्जियमको राजगद्धीमा पुगेका थिए। उनी सो पदमा सन् २०१३ को जुलाईसम्म आसिन रहे। स्वास्थ्यको कारण देखाउँदै उनले आफ्नो गद्धी आफ्ना छोरा फिलिपेलाई हस्तानतरण गरेका थिए।
मुद्धा परेपछि राजा अल्बर्टले सुरूसुरूमा डिएनए परीक्षण गर्न अस्वीकार गरेपनि सोका लागि प्रतिदिन ५ हजार युरो जरिमाना हुने भएपछि डिएनए टेस्ट गर्न बाध्य बनेका थिए।
जनवरीमा उनले डेल्फिन लाई आफ्नो चौथो सन्तानका रूपमा स्वीकार गरेका हुन्।
बेल्जियम संवैधानिक राजतन्त्र छ र त्यहाँ राजाको भूमिका औपचारिक्तामा सिमित छ।
