निहत्ता अश्वेत अमेरिकी पुरूष जर्ज फ्लोयडको मृत्युका मूख्य आरोपी अमेरिकी प्रहरी जमानतमा जेलबाट रिहा भएका छन्।
आरोपी डेरेक चौविन १० लाख अमेरिकी डलरको जमानतमा बुधबार बिहान रिहा भएका हुन्।
शंकास्पद भएको भन्दै फ्लोयडलाई नियन्त्रण लिने क्रममा करिब ८ मिनेटसम्म फ्लोयडको घाँटी थिचेपछि उनको मे २५ मा मृत्यु भएको थियो।
घटनाको भिडिओ सामाजिक संजालमा सार्वजनिक भएपछि अमेरिका भर अश्वेतमाथि पुलिसको बर्बरतालाई लिएर हिंसात्मक प्रदर्शनहरू भएका थिए।
'ब्ल्याक लाइफ म्याटर्स' नाम दिइएको ती प्रदर्शनहरूलाई नियन्त्रणमा लिन केही शहरमा कर्फ्यू लगाउनुका साथै नेशनल गार्डसमेत परिचालन गर्नुपरेको थियो।
पछि यो अभियान संसारभर फैलिएको थियो।
घटनाको तीव्र विरोध र प्रदर्शन भएपछि चौविनलाई प्रहरी सेवाबाट बर्खास्त गर्नुकासाथै दोस्रो तहको हत्या र मानवसंहारमा मुद्दा चलाइएको छ।
घटनाका मतियार भन्दै चौविनसँगै अन्य तीन प्रहरी अधिकारीहरू जे अलेक्जेंडर कुएग, थोमस लेन र टाउ थाओलाई पनि जिम्मेवारीबाट हटाइएको थियो। उनीहरूमाथि घटना घटाउन सहयोग गरेको आरोप लगाइएको थियो।
फ्लोयडका परिवारका वकिलले चौविनको रिहाइ 'पीडाको सम्झना' गराएको प्रतिक्रिया दिएका छन्।
