१२ वर्षअघि बानेश्वरमा खुकुरी प्रहार गरी फरार भएका व्यक्ति पक्राउ परेका छन्।
महानगरीय प्रहरी परिसर, काठमाडौंले सिन्धुपालचोक घर भएका ३१ वर्षीय अमिर भन्ने अम्बिर लामालाई पक्राउ गरेको हो।
उनलाई परिसरको विशेष टोलीले बुधबार टेकुबाट पक्राउ गरेको प्रवक्ता प्रहरी नायब उपरीक्षक प्रमेश विष्टले बताए।
अम्बिरले २०६५ साल पुस २४ गते राति बानेश्वरमा काभ्रे घर भई काठमाडौं बस्ने १९ वर्षीय सन्जिब लामामाथि खुकुरी प्रहार गरेका थिए।
त्यसबेला सन्जिबमाथि अम्बिरसहित अन्य चार जनाले खुकुरी प्रहार गरेका थिए। खुकुरी प्रहारबाट उनी सख्त घाइते भएका थिए।
'१२ वर्षअघि उनीसहित चार/पाँच जनाले खुकुरी प्रहार गरेका थिए,'प्रहरी नायब उपरीक्षक विष्टले भने,'यस मुद्दामा थप अनुसन्धान गरिरहेका छौं।'
पछिल्लो समय काठमाडौं परिसरले फरार भएका आरोपित तथा अभियुक्तहरूलाई पक्राउ तथा अदालतको निर्णय कार्यान्वयन गराउने काममा तीव्रता दिएको छ। यसको लागि परिसरले विशेष टोली नै खटाएको छ।
प्रवक्ता विष्टका अनुसार एक महिनाभित्रमा ४० जना भन्दा बढी फरार प्रतिवादीहरूलाई पक्राउ परिसकेका छन्।
'हामीले फरार रहेका व्यक्तिहरूलाई पक्राउ गर्ने कामलाई तीव्रता दिएका छौं,'उनले भने,'एक महिनाभित्रै हामीमले ४० जनाभन्दा बढीलाई पक्राउ गरेका छौं।'
