महोत्तरीमा ट्वाइलेटको पानी बगेको विषयलाई लिएर झगडा हुँदा एक जनाको मृत्यु भएको छ भने अन्य दुई जना घाइते भएका छन्।
जिल्लाको मटिहानी नगरपालिका वडा नं. ३ बर्दाहाका हजरत राइन र आलिम राइन पक्षबीच चर्पीको पानी बगेको विषयमा झै-झगडा तथा कुटपिट हुँदा एक जनाको मृत्यु भएको महोत्तरीका प्रहरी प्रवक्ता प्रहरी नायब उपरीक्षक प्रकाश विष्टले जानकारी दिए।
झै-झगडामा घाइते भएकाहरूलाई उपचारका लागि प्रादेशिक अस्पताल जनकपुर ल्याउने क्रममा मटिहानी नगरपालिका वडा नं. ३ बर्दाहाका २५ वर्षीय मो.जाबेद राइनको मृत्यु भएको प्रवक्ता विष्टले जानकारी दिए।
त्यस्तै, २० वर्षीय छोटन राइनको अवस्था मध्यम रहेको र उनको उपचार प्रादेशिक अस्पताल जनकपुरमा भइरहेको छ भने ३५ वर्षीय मोतालिम कवारीलाई थप उपचारको लागि विराटनगर पठाइएको प्रहरीले जनाएको छ।
घटनामा संलग्न ४४ वर्षीय असरफ कवारी र १९ वर्षीय अमानुल राइनलाई नियन्त्रणमा लिइएको प्रवक्ता विष्टले जानकारी दिए।