मोरङ बेलवारीमा भएको ग्याङ फाइट काण्डमा हत्या गरेको अभियोगमा एक आरोपितलाई प्रहरीले एक वर्षपछि पक्राउ गरेको छ।
प्रहरीले मोरङकै ग्रामथान–२ का ३१ वर्षीय कृष्ण चौधरीलाई शनिबार पक्राउ गरेको हो । पक्राउ परेका चौधरी घटनाका मुख्य अभियुक्त भएको प्रहरीको दाबी छ।
बेलबारी–५ कसेनी लोहन्द्रा खोलामा भएको ग्याङ फाइटका क्रममा एक जनाको मृत्यु भएको थियो। अघिल्लो वर्ष भदौ १२ गते भएको ग्याङ फाइटमा धारिलो हतियार लागेर घाइते भएका चन्द्रकुमार राईको उपचारको क्रममा मृत्यु भएको थियो।
प्रहरीले यस घटनामा संलग्न भएको आरोपमा यसअघि ६ जनालाई पक्राउ गरि कर्तव्य ज्यान मुद्दामा मोरङ अदालतमा मुद्दा दर्ता गरेको थियो ।
घटनापछि चौधरी फरार थिए। दुहबीमा बस्दै आएका चौधरीलाई प्रहरीले सुन्दरहरैंचा नगरपालिकाको बाँसबारीबाट पक्राउ गरेको मोरङ प्रहरीका प्रवक्ता डिएसी दिपक श्रेष्ठले जानकारी दिए।
पक्राउ परेका चौधरीलाई मोरङ अदालतमा पठाइएको डिएसी श्रेष्ठले सेतोपाटीलाई बताए। अदालतमा चौधरीको बयान सकिएपछि थुनछेक बहस हुनेछ। बहस सकिएपछि अदालतले आदेश गर्नेछ।
यो घटनामा प्रहरीले यसअघि बेलबारी नगरपालिका ५ तेलकुडीका ३१ वर्षीय विनयकुमार सरदार, ग्रामथान गाउँपालिका–६ का ३४ वर्षीय जितेन्द्र चौधरी, ३१ वर्षीय दीपेन्द्र चौधरी, ३२ वर्षीय वीरेन्द्रकुमार खाँ, बेलबारी–६ का ३८ वर्षीय विशालकुमार खवास र ३१ वर्षीय राजेन भनिने राजेन्द्र राईलाई पक्राउ गरेको थियो।