काठमाडौंको थापाथलीमा मिनी ट्रकले ठक्कर दिँदा स्कुटर चालकको मृत्यु भएको छ।
आइतबार बिहान पौने ६ बजे थापाथलीबाट त्रिपुरेश्वर जाँदै गरेको बा २ ख ७३२७ नम्बरको मिनी ट्रकले विपरीत दिशाबाट आइरहेको बा २४ प ९३५९ नम्बरको स्कुटरलाई ठक्कर दिएको हो।
स्कुटर चालक काभ्रे घर भई काठमाडौं सीतापाइला बस्ने १९ वर्षीय सुजन सापकोटाको मृत्यु भएको महानगरीय प्रहरी वृत्त सिंहदरबारले जनाएको छ।
दुर्घटनापछि उपचारको लागि उनलाई नर्भिक अस्पताल लगिएको थियो।
उनको उपचारको क्रममा मृत्यु भएको प्रहरीले जनाएको छ। स्कुटरमा पछाडि सवार २२ वर्षीय आशिष हुमागाईको नर्भिक अस्पतालमै उपचार भइरहेको छ।
ट्रक चालकलाई प्रहरीले नियन्त्रणमा लिएको छ। महानगरीय प्रहरी वृत्त सिंहदरबारले घटनाको थप अनुसन्धान अघि बढाएको छ।