बालाजुमा ग्यासको बुलेटमा च्यापिएर चालकको मृत्यु भएको छ।
मृत्यु हुनेमा भारत कलकत्ताका ४५ वर्षीय दिलीप चौधरी रहेको प्रहरीले जनाएको छ।
दुई वटा ग्यास बुलेको बीचमा च्यापिँदा उनको बिहीबार बिहान मृत्यु भएको महानगरीय प्रहरी परिसर काठमाडौंले जनाएको छ।
काठमाडौं-१६ बालाजु औद्योगिक क्षेत्रमा दुई वटा ग्यास बुलेट पार्किङमा थिए।
प्रहरीका अनुसार ती बुलेट एनएलओ २ क्यु ३७२० र एनएलओ २ क्यु ३७२९ नम्बरको बुलेटको बीचमा चौधरी च्यापिएका थिए।
चालक चौधरी एनएलओ २ क्यु ३७२९ को बुलेटका चालक हुन्। बुलेटको अगाडिको भाग पुछपाछ गरिरहेका बेला उक्त बुलेट गुडेर अर्को बुलेटसम्म पुग्दा चालक चौधरी बीचमा च्यापिएका थिए।
गम्भीर घाइते भएका चालकलाई तत्काल उद्धार गरी त्रिवि शिक्षण अस्पताल लगिएको थियो। उनको उपचारका क्रममा मृत्यु भएको परिसर प्रवक्ता प्रहरी उपरीक्षक दिनेशराज मैनालीले बताए।
घटनाबारे महानगरीय प्रहरी वृत्त बालाजुको टोलीले अनुसन्धान गरिरहेको उनले जानकारी दिए।