हप्याक नामबाट चिनिने र्यापर मिलनजंग कुँवरको मुखमा अगुल्टोले पोलेको आरोपमा एक जना झाँक्रीलाई प्रहरीले पक्राउ गरेको छ।
नवलपरासी पूर्व देवचुली नगरपालिका-१२ का ४२ वर्षीय झाँक्री दीपक सार्कीलाई प्रहरीले पक्राउ गरेको जिल्ला प्रहरी कार्यालयका डिएसपी सन्तोष पाठकले जानकारी दिए।
उनले कावासोती नगरपालिका-१ कोइलापानी बस्ने र्यापर हप्याकको मुखमा अगुल्टोले पोलेका थिए। परिवारले प्रहरीमा जाहेरी दिएपछि झाँक्री सार्कीलाई गत शुक्रबार कावासोतीबाट पक्राउ गरेको हो।
डिएसपी पाठकका अनुसार घटना कात्तिक १६ गतेको हो। र्यापर हप्याक बिरामी थिए। बिरामी भएका उनलाई झाक्रीले झारफुक गरी निको पारिदिने बताएका थिए।
झारफुक गर्ने बहानामा उनले अगुल्टोले मुखमा पोलाएको डिएसपी पाठकले बताए।
पक्राउ परेका झाक्रीमाथि जिल्ला अदालतबाट आइतबार म्याद थप गर्ने तयारी गरेको छ।
‘आज म्याद थप गर्ने तयारी छ। वकिलहरूसँग सल्लाह गरी कुन मुद्दा अघि बढाउँदा हुन्छ त्यही अनुसार अनुसन्धान अघि बढाउँछौं,’ डिएसपी पाठकले भने।
उनको अहिले चितवन मेडिकल कलेजमा उपचार भइरहेको छ।
