विराटनगरस्थित तुलसी बहुमुखी सहकारीका सन्चालकहरूले आफूहरूको करोडौं रकम ठगेको भन्दै जिल्ला प्रहरी मोरङमा उजुरी दिने सर्वसाधारणको लर्को लागेको छ।
मोरङ प्रहरी प्रमुख एसपी दिपक पोखरेलका अनुसार सहकारीका क्षेत्रीय प्रबन्धकसहित ८ जना पदाधिकारीहरूका विरूद्धमा ठगीमा जाहेरी दरखास्त परेको छ। उनीहरूमध्ये प्रहरीले संस्थाका उपाध्यक्ष, सचिव र प्रबन्धकलाई पक्राउ गरेर अनुसन्धान थालेको छ।
संस्थाका १२१ जना सदस्यले जाहेरी दिएको र जाहेरी पर्ने क्रम जारी रहेको एसपी पोखरेलले बताए।
पक्राउ पर्नेहरूमा उर्लाबारी नगरपालिका-६ घर भई संस्थाको उपाध्यक्ष अनिता गौतम, झापा भद्रपुर नगरपालिका-१४ घर भई विराटनगर-३ बस्ने सहकारीका सचिव सविना न्यौपाने र विराटनगर-२ बस्ने संस्थाका क्षेत्रीय प्रबन्धक मन्दिप खवासलाई पक्राउ गरेको थियो।
उनीहरू तीनै जना यसअघि नै पक्राउ परिसकेका थिए। अभद्र मुद्दामा थुनामा रहेका उनीहरूलाई ठगीमा उजुरी आएपछि अनुसन्धान थालिएको प्रहरीले जनाएको छ। अन्य ५ जना पदाधिकारीहरूको खोजी कार्य जारी रहेको प्रहरीले जनाएको छ।
नेपालभरी कार्यक्षेत्र रहने गरी २०५२ चैत १३ गते सहकारी विभागमा दर्ता नं. ४१७-०५२-०५३ मा दर्ता रहेको तुलसी सहकारीले बचतकर्ताहरूको ठूलो रकम ठगेको प्रहरीको भनाइ छ। देशैभरी २१ हजार ७१३ सदस्य रहेको सहकारीमा विराटनगरमा मात्रै ४ हजार भन्दाबढी सदस्य छन्।
मुख्य कार्यालय विराटनगरमा रहेको सहकारीको झापाको दमक, उदयपुरको गाईघाट र सिरहाको गोलबजारमा ३ वटा सेवा केन्द्र छन्।
प्रहरीका अनुसार फागुन १ गतेदेखि सहकारी संस्थाको कार्यालय बिना जानकारी बन्द भएको र सञ्चालक समितिका सबै पदाधिकारीहरू सम्पर्कविहीन थिए।
‘बचतकर्ताहरूको रकम फिर्ता नदिई फरार रहेको हुँदा बाल बचत, ज्येष्ठ नागरिक बचत, भविष्य सुनिश्चित बचत, सुपर पेन्सन बचत, अवधि बचत, कर्मचारी चल्ती बचत, विशेष बचत, साधारण बचत लगायत खाताहरूमा बचत भएको देखिन्छ,’ एसपी पोखरेलले भने, ‘संस्थाको शेयर सदस्य हुँदा १५ प्रतिशत भन्दा बढी व्याज, बोनस लगायतका आकर्षक आर्थिक सुविधा पाउने आश्वासन र प्रलोभनमा परी जाहेरवालाहरूले आफ्नो तथा बालबच्चा सहित परिवारका अन्य सदस्यहरूको सुरक्षित भविष्यको आशामा बचतकर्ताहरूले ठुलो रकम बचत गरेको देखिएको छ।’
सहकारी संस्थाको केन्द्रीय कार्यालय समेत बन्द भई सञ्चालकहरू नै फरार भएपछि आफूहरू ठगीमा परेको भन्दै आइतबार मात्रै १२१ जना सदस्यहरूले १२ करोड ९ लाख ४ हजार ४८७ रूपैयाँ बराबरको रकम ठगी गरेको भन्दै जाहेरी दिएका थिए।
हालसम्मको प्रारम्भिक अनुसन्धानबाट योजनावद्ध तरिकाले ठुलो रकम हिनामिना गरी संस्थाका सदस्य एवं बचतकर्ताहरूलाई ठगी गरेको देखिन आएको प्रहरीको भनाइ छ।
--1715160207.JPG)
