ओपनर इशान पाण्डे र मध्यक्रममा ब्याट्सम्यान कुशल मल्लले नेपालको टी–२० राष्ट्रिय टिममा डेब्यू गरेका छन्।
पहिलो पटक राष्ट्रिय टिममा परेका इशान र कुशलले सिंगापुरमा सुरु त्रिकोणीय सिरिजमा जिम्बावेविरुद्ध खेलेर राष्ट्रिय टिममा डेब्यू गरेका हुन्।
सिंगापुरको इन्डियन एसोसिएसन मैदानमा टस जितेर पहिले ब्याटिङ गरेको नेपालका लागि इशानले ओपनिङ गरेका थिए।
यद्यपी उनी ८ बलमा ४ रन जोडेर आउट भए। कुशल भने २ रनमै आउट भएका छन्।
यो पनि : एमबिबिएस पढ्दै गरेका इशान राष्ट्रिय टिममा, भन्छन्- ओपनिङ सम्हाल्छु
सन् २०१६ मा बंगलादेशमा भएको यु-१९ विश्वकपमा इशान नेपाली टिममा थिए। १५ वर्षीय कुशल हाल नेपाली यु-१९ टिमका महत्वपूर्ण सदस्य हुन्।
२०१६ को विश्वकपमा बेन्चमै सीमित बन्न पुगेका इशानको खेल करिअरले त्यसपछि पनि उचाइ लिन सकेन।
घरेलु फ्रेन्चाइज लिगमा उनी बिक्न सकेनन्।
गत जेठमा भएको प्रधानमन्त्री कपमा इशान प्रदेश ३ को टिममा परे। जहाँ उनले राष्ट्रिय टिमका कप्तान पारस खड्का र उपकप्तान ज्ञानेन्द्र मल्लसँग ‘ड्रेसिङ रूम सेयर’ गर्ने मौका पाए।
उनले प्रधानमन्त्री कपमा त्रिभुवन आर्मी क्लबविरूद्ध ७९ रन र सुदूरपश्चिमविरूद्ध ५३ रन बनाए। यही प्रदर्शनले उनलाई राष्ट्रिय टिमको बन्द प्रशिक्षणका लागि ढोका खोलिदियो।
क्याम्पबाट अन्तिम १५ मा परेसँगै इशानका लागि अब ‘टप अर्डर’ मा ब्याटिङ गर्ने जिम्मेवारी हुनेछ।
यता दुई वर्षको बीचमा यु-१६ हुँदै यु-१९ टिममा आक्रामक ब्याट्सम्यानको छवि बनाएका उनी अहिलेको राष्ट्रिय टिमका सबभन्दा कान्छा सदस्य हुन्।
कुशल यु-१६ टिमका लागि ओपनिङ गर्थे। पछि उनको जिम्मेवारी परिवर्तन गर्दै 'मिडल अर्डर ब्याट्सम्यान' बनाइयो।