नेपाल भ्रमणमा रहेको विश्वको ऐतिहासिक मेरिलेबोन क्रिकेट क्लब (एमसिसी) ले नेपालविरुद्धको तीनदिवसीय खेलको पहिलो दिन राम्रो प्रदर्शन गरेको छ।
कीर्तिपुरस्थित त्रिवी क्रिकेट मैदानमा टस हारेर पहिले ब्याटिङ गरेको एमसिसीले पहिलो दिन खराब प्रकासका कारण ८६ ओभरमा खेल रोकिनुअघि ६ विकेटको क्षतिमा ३११ रन जोडेको छ। एमसिसीका यासिर आराफात ३५ रन र एलेक्स थमसन २१ रन बनाएर खेलिरहेका छन्।
पहिलो दिन विल रोड्सले सबैभन्दा बढी ७३ रनको योगदान गरेका छन्। यस्तै विल वेन्डर्सपरले ५३ रन बटुलेका छन् भने माइल्स हामुदले ५१ रन जोडेका छन्।
बलिङमा नेपालका सन्दीप लाछिमाने, सोमपाल कामी र शरद भेषवाकरले समान २-२ विकेट लिएका छन्।
खेलमार्फत कप्तान ज्ञानेन्द्र मल्लसहित विनोद भण्डारी, ललितनारायण राजवंशी, राजु रिजाल, आरिफ शेख, सन्दीप लामिछाने, दीपेन्द्रसिंह ऐरी, करण केसी, पवन सरार्फ गरी ९ जनाले प्रथम श्रेणीको क्रिकेटमा डेब्यू गरेका छन्।
नेपालले प्रथम श्रेणीको क्रिकेट सन् २००५ पछि पहिलो पटक खेलेको हो। १४ वर्षअघि घरेलु मैदानमा यूएईसँग अन्तरमहादेशीय तीनदिवसीय प्रतियोगिता नेपालको पछिल्लो प्रथम श्रेणीको खेल हो ।
सन् २००९ मा पनि नेपालले एमसिसीसँग तीनदिवसीय खेल खेलेको थियो। एमसिसीविरुद्ध नै खेलेको त्यो प्रतियोगितालाई भने प्रथम श्रेणीको मान्यता थिएन। सन् २००९ मा एमसिसीविरुद्ध ज्ञानेन्द्र मल्लले खेलेका थिए।
एमसिसीविरुद्धको उक्त खेललाई प्रथम श्रेणीको मान्यता नहुँदा राष्ट्रिय टिमका कप्तान ज्ञानेन्द्रले पनि प्रमथ श्रेणीमा डेब्यू गरेका हुन्।
नेपाली टिममा रहेका खेलाडी मध्ये सोमपाल कामी र शरद भेषवाकर मात्र प्रथम श्रेणीको क्रिकेट खेलेका छन्।
