विराटनगर टाइटन्स पोखरा प्रिमियर लिग (पिपिएल) को फाइनलमा प्रवेश गरेको छ। बिहीबार पोखरा क्रिकेट मैदानमा बुटवल ब्लास्टर्सलाई २१ रनले पराजित गर्दै विराटनगर फाइनलमा पुगेको हो।
विराटनगरले दिएको १ सय ६६ रनको लक्ष्य पछ्याएको बुटवलले २० ओभरमा १ सय ४४ रनमा अलआउट भयो।
अब उपाधिका लागि विराटनगरले शनिबार चितवन टाइगर्ससँग प्रतिस्पर्धा गर्दैछ।
जितका लागि २६ रन चाहिएको अवस्थामा १९औं ओभरमा जितेन्द्रसिंह मुखियाले मेडन ओभर फ्याँकेपछि खेल विराटनगरको पक्षमा गएको थियो।
बुटवलका लागि भीम सार्कीले ४४ रन र अफ्तबुद्धिन अहमेदले ४३ रन बटुले। पुरन विकले १५ रन र शिभम् सिंहले १४ रन बनाए।
बलिङमा विराटनगरका साहब अलामले ३ विकेट लिए। पुनित मेहराले पनि ३ विकेट हात पारे। उनले तीनै विकेट अन्तिम ओभरमा लिएका थिए। किशोर महतो, मोहमद जाइद अलाम र जितेन्द्र मुखियाले १-१ विकेट लिए।
त्यसअघि टस हारेर पहिले ब्याटिङ गरेको विराटनगरले २० ओभरमा ५ विकेटको क्षतिमा १ सय ६५ रन जोडेको थियो।
विराटनगरका लागि सुनील धमालले सबभन्दा बढी ६५ रन जोडे। उनले ५४ बलमा ६ चौका र २ छक्का हिर्काए।
कप्तान प्रदीप ऐरीले नटआउट ३३ रनको योगदान दिए। प्रदीपले १३ बलमा १ चौका र ४ छक्का प्रहार गरे।
मोमहद जाइद अलामले २० रन जोड्दा पुनित मेहरा र लोकेश बमले १९-१९ रन बटुले।
बलिङमा बुटवलका हर्ष टोङले २ विकेट लिए। ललित भण्डारी र अभिनास बोहराको नाममा १-१ विकेट रह्यो।