क्रिकेट विश्वकप लिग-२ अन्तर्गत नेपाल, अमेरिका र ओमानबीच हुने त्रिकोणात्मक एकदिवसीय सिरिजका लागि नेपाल क्रिकेट संघ (क्यान) ले तयारी थालेको छ।
सिरिजका लागि पहिलो चरणमा क्यानले त्रिभुवन विश्वविद्यालय मैदानलाई व्यवस्थित गर्ने भएको छ। मैदानमा केहि स्थानमा घाँस रोपिएको छ भने लेभलिङ समेत गरिएको छ।
यस्तै सिरिजका लागि हुने खर्चको विवरण क्यानले आइसिसीलाई पठाइसकेको छ। मैदान लगायतको तयारी अवलोकनका लागि आइसिसीका प्रतिनिधि जनवरी पहिलो साता काठमाडौं आउने भएका छन्।
'हामीले आफ्नोतर्फबाट गर्नुपर्ने सबै तयारी गरिरहेका छौं,' क्यानका सचिव अशोकनाथ प्याकुरेलले सेतोपाटीसँग भने,'अब आइसिसीका प्रतिनिधि आएपछि अन्य कामको विषयमा छलफल हुनेछ।'
लिग-२ मा नेपालसहित स्कटल्यान्ड, युएई, नामिबिया, ओमान, पपुवा न्युगिनी र अमेरिका सहभागी छन्।
नेपाल बाहेक अरु सबैले सिरिजको सुरुवाती खेल खेलिसकेका छन्।
नेपालको पहिलो सिरिजको रुपमा रहेको त्रिकोणात्मक सिरिज फेब्रुअरी पहिलो साता हुने सम्भावना छ। तर आइसिसीले मिति अझै टुंगो लगाइसकेको छैन।
'तीन देशसँग मितिबारे छलफल गरेपछि आइसिसीले अन्तिम मिति टुंगो लगाउँछ। सम्भवत फेब्रुअरी ४ पछि सिरिज हुने सम्भावना छ,' प्याकुरेलले भने।
कीर्तिपुरमा हुने सिरिजमा ६ वटा एकदिवसीय खेल हुनेछन्। जसमा प्रत्येक टिमले २-२ वटा एकदिवसीय खेल खेल्नेछन्।
सचिव प्याकुरेलले नेपाल र मलेसियाबीच हुने भनिएको टी- २० र एकदिवसीय सिरिज अहिले नै पक्का नभएको बताए। मलेसियाले मनमोहन मोमोरियल कपमा सहभागी हुन आउने भएपछि नेपालसँग अन्तर्राष्ट्रिय सिरिज खेल्ने इच्छा देखाएको प्याकुरेलले बताए।
'यो समयमा कीर्तिपुर मैदानमा खेलाउन सम्भव छैन। त्यसैले हामीले मिति र स्थान बारे छलफल गरिरहिका छौं। तर खेल्ने पक्का भइसकेको छैन,' उनले भने।
