बिहीबार सुरु मनमोहन मेमोरियल एकदिवसीय क्रिकेट प्रतियोगितामा प्रदेश १ ले प्रदेश ५ लाई ६८ रनले पराजित गरेको छ।
सुनसरीको इनरुवामा भएको खेलमा दुवै टिमको ब्याटिङ भने कमजोर देखियो।
पहिले ब्याटिङ गरेको प्रदेश ३१.२ ओभरमा १२० रनमा अलआउट भयो। उसका लागि फिर्दोस अन्सारीले सबैभन्दा बढी २३ रन जोडे भने पुष्प थापा र दिपेश कँडेलले २२-२२ रन जोडे। लव कामत ११ रनमा आउट हुँदा ८ ब्याट्सम्यान दोहोरो अंकमा रन जोड्न नपाइ आउट भए।
बलिङमा प्रदेश ५ का विक्रम भुषालले ५ विकेट लिए। उनले ८.२ ओभरमा २ मेडन खर्चिदा २४ रन दिए। दुर्गेश गुप्ताले २ विकेट लिए।
१२१ रनको लक्ष्य पछ्याएको प्रदेश ५ ले खराब ब्याटिङको नमुना प्रस्तुत गर्यो। १८ ओभरमा ५२ रनमै अलआउट भयो प्रदेश ५ का लागि २ ब्याट्सम्यानले मात्र दोहोरो अंकमा रन बटुले। विराट भण्डारीले २८ र विशाल विक्रम केसीले १२ रन जोडे।
बलिङमा प्रदेश १ का दिपेश कँडेलले ७ ओभरमा ६ विकेट लिए। उनले १ मेडन राख्दा २० खर्चिए। मुकुन्द यादव र मनोज तामाङले २-२ विकेट हात पारे। २२ रन जोडेर ६ विकेट लिएका दिपेश खेलको म्यान अफ दि म्याच भए।
क्लब आयोजक रहेको प्रतियोगितामा प्रदेशका टिमहरु प्रतिस्पर्धाबिनै छनोट भएकाले ब्याटिङ कमजोर देखिएको हो। प्रतियोगिताअघि सबै प्रदेशले बिना तयारी आयोजकलाई नाम मात्र पठाएका थिए। यस्तै प्रदेश टिमले प्रतियोगिताका लागि कुनै पनि तयारी र बन्द प्रशिक्षण राखेको थिएन।