अन्तर्राष्ट्रिय क्रिकेट काउन्सिल (आइसिसी) ले भारतीय क्रिकेट नियन्त्रण बोर्ड (बिसिसिआई) लाई सन् २०२१ मा भारतमा आयोजना गरिने टी-२० विश्वकपको कर छुट विषयमा टुंगो लगाउन समयसीमा दिएको छ।
आइसिसीले आगामी डिसेम्बरभित्र विश्वकपको कर छुट भारतीय सरकारबाट गराउनका लागि समय दिएको हो। आइसिसीको बिहीबार बसेको बोर्ड बैठकले यो निर्णय गरेको हो।
यसअघि समयमै कर छुटको विषय टुंगो नलगाएको भन्दै आइसिसीले सन् २०२१ मा भारतमा आयोजना गरिने टी-२० विश्वकप अन्तै सार्ने चेतावनी दिएको थियो।
बिसिसिआईले कर छुट गर्ने विषयमा जुन ३० जुनसम्म कुर्नका लागि आइसिसीलाई इमेल गरेको थियो। तर आइसिसीले बिसिसिआईको अनुरोधलाई अस्वीकार गर्दै प्रतियोगिता नै अन्त सार्ने चेतावनी दिएको थियो।
आइसिसी र बिसिसिआईबीच कर छुटको विषयमा सन् २०१६ देखि नै विवाद हुँदै आएको छ।
सन् २०१६ को टी–२० विश्वकप भारतमा आयोजना हुँदा कर छुट भएको थिएन। जसका कारण आइसिसीलाई २० देखि ३० मिलियन अमेरिकी डलर घाटा भएको अनुमान गरिएको छ।
त्यसैले सन् २०२१ को टी-२० विश्वकपको कर छुट नभए करोडौं डलर घाटा पर्ने भन्दै आइसिसीले बिसिसिआईलाई दबाब दिँदै आएको छ।