कोपा अमेरिका फुटबल प्रतियोगिताको आयोजक टिम ब्राजिल सेमिफाइनलमा प्रवेश गरेको छ।
शुक्रबार विहान भएको पहिलो क्वार्टरफाइनल खेलमा पाराग्वेलाई पेनाल्टी सुटआउटमा ४-३ ले पराजित गर्दै ब्राजिल अन्तिम चारमा पुगेको हो।
पेनाल्टी सुटआउटमा ब्राजिलका लागि विलियन, मार्किनोस, फिलिप काउटिन्हो र गाब्रियल जेससले गोल गरेका थिए। चौथो नम्बरमा पेनाल्टी प्रहार गर्न आएका रोबर्टो फिर्मिनोको प्रहार भने आउट भएको थियो।
पाराग्वेका लागि अल्मिरोन, भाल्डेज र जुवान रोद्रिगो रोजासले गोल गरे। तर पहिलो नम्बरमा पेनाल्टि हान्न आएका गुस्ताफो गोमेजको प्रहारलाई ब्राजिलका गोलकिपर एलिन्सनले रोकेका थिए। यस्तै पाँचौ नम्बरमा पेनाल्टी हानेका डेर्लिस गोन्जालेजको प्रहार आकासियो।
त्यसअघि निर्धारित सयमको खेल गोलरहित बराबरीमा सकिएको थियो। खेलको ५८ मिनेटमा पाराग्वे १० खेलाडीमा सीमित बने पनि ब्राजिलले त्यसको फाइदा उठाउन सकेन। पाराग्वेका फाबियन रातो कार्ड पाउँदै मैदान छाड्न बाध्य भएका थिए।
प्रतियोगिताअन्तर्गत शुक्रबार मध्य रात पौने १ बजे भेनेजुएला र अर्जेन्टिनाबीच खेल हुँदैछ। यस्तै शनिबार सवेर विहान पौने पाँच बजे कोलम्बिया र चिली भिड्नेछन्।
