इंग्लिस प्रिमियर लिगमा टोटेनहमले सानदार जित हात पारेको छ। आइतबार राति भएको खेलमा टोटेनहमले म्यानचेस्टर युनाइटेडविरुद्ध ६-१ गोलको जित हात पारेको हो।
म्यानचेस्टरका ब्रुनो फर्नान्डेजले दोस्रो मिनेटमा पेनाल्टीबाट आफ्नो टिमलाई अग्रता दिलाए। त्यसपछि उत्कृष्ट लयमा देखिएको टोटेनहमले ६ गोल गर्न सफल भयो।
टोटेनहमले चौथो मिनेटमा टांगी एन्डोम्बेलेको गोलबाट बराबरी गोल फर्काउन सफल भयो। सातौं मिनेटमा टोटेनहमले खेलमा अग्रता लियो। सन ह्युङ मिनले गोल गरे।
२८ मिनेटमा म्यानचेस्टर १० खेलाडीमा सीमित बन्यो। रेफ्रीले मार्सियललाई सिधा रातो कार्ड देखाउँदै मैदान बाहिर पठाएका थिए। उनले टोटेनहमका लामेलामाथि हात उठाएका थिए।
३० मिनेटमा ह्यारी केनले टिमका लागि तेस्रो गोल गरे। यस्तै सनले ३७ मिनेटमा चौथो गोल गर्दा टोटेनहम पहिलो हाफमै ४-१ ले अघि रह्यो।
दोस्रो हाफमा टोटेनहमका लागि औरीएरले ५१ मिनेट र केनले ७९ मिनेटमा पेनाल्टीमा गोल गरेका थिए।
जितपछि टोटेनहम ४ खेलबाट ७ अंक जोड्दै अंक तालिकाको छैटौं स्थानमा उक्लिएको छ। म्यानचेस्टर ३ खेलबाट ३ अंक जोडेर १६औं स्थानमा छ।