इंग्लिस प्रिमियर लिगमा म्यानचेस्टर युनाइटेडले एभर्टनलाई पराजित गरेको छ।
शनिबार भएको खेलमा म्यानचेस्टरले ३-१ गोलको जित हात पार्यो।
म्यानचेस्टरको जितमा ब्रुनो फर्नान्डेजले दुई गोल गरे।
खेलमा अग्रता भने एभर्टनले लियो। एभर्टनका लागि बेर्नाल्डले १९ मिनेटमा गोल गरेका थिए।
म्यानचेस्टरका लागि २५ मिनेटमा फर्नान्डेजले बराबरी गोल गर्न सफल भए। ३२ मिनेटमा उनले व्यक्तिगत तथा टिमका लागि दोस्रो गोल गर्दा म्यानचेस्टर २-१ गोलले अघि बढ्यो।
म्यानचेस्टरका लागि तेस्रो गोल इडिन्सन काभानीले गरे। काभानीले इन्जुरी टाइमको पाँचौ मिनेटमा गोल गरेका थिए।
जितसँगै म्यानचेस्टर ७ खेलबाट १० अंक जोडेको छ। म्यानचेस्टर अंक तालिकाको १३औं स्थानमा छ।
एभर्टनले शीर्ष स्थानमा उक्लने मौका गुमाएको छ। हारसँगै एभर्टन ८ खेलबाट १३ अंक जोड्दै पाँचौ स्थानमा सीमित छ।
