नेपाल सुपर लिगमा पोखरा थन्डर्सले शीर्ष चारमा रहेर प्लेअफमा पुग्ने सम्भावना कायमै राखेको छ।
शुक्रबार साँझ दशरथ रंगशालामा भएको खेलमा १० खेलाडीमा सीमित एफसी चितवनमाथि उत्कृष्ट पुनरागमन गर्दै पोखराले प्लेअफ सम्भावना कामयै राखेको हो।
पोखराले खेलमा १-० गोलले पछि परेको अवस्था उल्टाउँदै २-१ को जित निकाल्यो।
खेलको ७२ मिनेटमा शिशिर लेखीले गोल गर्दै चितवनलाई अग्रता दिलाए।
खेलको ८२ मिनेटमा चितवन १० खेलाडीमा सीमित बन्यो। गोलकिपर विशाल सुनारले डिबक्स बाहिर हातले बल छोएपछि रेफ्रीले सिधा रातो कार्ड दिए। उनको स्थानमा दोस्रो रोजाइका गोलकिपर विश्वास चौधरी मैदान प्रवेश गरे।
८६ मिनेटमा पोखराले बराबरी गोल फर्कायो। उसका लागि नवयुग श्रेष्ठले फ्रिकिकमा गोल गरे। उनले डिबक्स नजिकबाट हानेको फ्रिकिकलाई चितवनका गोलकिपर विश्वास चौधरीले भेउ पाउन सकेनन्।
दोस्रो हाफको इन्जुरी टाइमको पाँचौ मिनेटमा राफायल रिम्गागोले उत्कृष्ट फिनिसिङ गर्दै पोखरालाई २-१ को रोमाञ्चक जित दिलाए।
जितसँगै ८ अंक बटुलेको पोखरा अंक तालिकाको तेस्रो स्थानमा उक्लिएको छ। पोखराले समूहका सबै ६ खेल खेलिसकेको छ।
अन्तिम खेलअघि १० अंक जोडेको शीर्ष स्थानको धनगढी एफसी र १० अंक नै जोडेको दोस्रो स्थानको काठमाडौं रेजर्स भने प्लेअफमा पुगिसकेका छन्।
तेस्रो स्थानको पोखरासँगै ७ अंक जोडेको चौथो स्थानको विराटनगर सिटी एफसी, ६ अंक जोडेको पाँचौ स्थानको ललितपुर सिटी र ५ अंक जोडेको बुटवल लुम्बिनी एफसीको प्लेअफमा पुग्ने सम्भावना छ।
यी चार टिम मध्ये दुई टिम प्लेअफमा पुग्नेछन्।
२ अंक जोडेर तालिकामा पुछारमा रहेको चितवन भने बाहिरिएको छ।