नेपाल कम्युनिष्ट पार्टी (नेकपा) का कार्यकारी अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ को नयाँ पुस्तक ‘नयाँ राजनीतिक विश्लेषण’ सार्वजनिक भएको छ।
उनले वि.सं. २०७४ देखि २०७७ सम्म विभिन्न सञ्चारमाध्यममा दिएका अन्तर्वार्ताहरूको सङ्ग्रह ‘नयाँ राजनीतिक विश्लेषण’ पुस्तक सार्वजनिक भएको हो।
सञ्चारमाध्यममा प्रकाशित अन्तर्वार्ताहरूको संगालो उक्त पुस्तकले तत्कालीन राजनीतिक परिस्थिति र परिघटना बुझ्न मद्दत गर्ने प्रज्ञा प्रतिष्ठानले जनाएको छ।
पुस्तकमा विस्तृत शान्ति सम्झौताको जगमा अन्तरिम संविधानदेखि संविधान सभासम्म, राजतन्त्रको अन्त्यदेखि गणतन्त्रको स्थापनासम्म, हतियार व्यवस्थापनदेखि सेना समायोजनसम्म, संविधान सभाबाट समानुपातिक समावेशी प्रतिनिधित्व सहितको सङ्घीय लोकतान्त्रिक गणतन्त्र, नेपालको संविधान निर्माणमा महत्वपूर्ण भूमिका निर्वाह गरेको पात्र हुनुको नाताले अध्यक्ष कमरेड प्रचण्डका अन्तर्वार्ताहरुको संगालो राजनीति शास्त्रका विद्यार्थी, नेपाली समाज र राजनीतिमा अनुसन्धान गर्न चाहने राष्ट्रिय तथा अन्तर्राष्ट्रिय अनुसन्धानकर्ता र नेपाली राजनीतिका बारेमा चासो राख्ने सबैका लागि उपयोगी हुने विश्वास लिइएको छ।
४०८ पृष्ठ रहेको उक्त पुस्तकको मूल्य ५५० रुपैयाँ छ।
पुस्तक राजधानी काठमाडौंलगायत देशका विभिन्न सहरका पुस्तक पसलमा पाइने प्रतिष्ठानले जनाएको छ।