सिनेमा हलमा राम्रा नेपाली फिल्म हेर्न दर्शकले अझै कति कुर्नुपर्ने हो निश्चित छैन। महामारीको जोखिम कम भएपछि बिस्तारै हलिउड र बलिउडका नयाँ र चर्चा कमाएका फिल्म हेर्न पाउने वातावरण भने बन्दैछ।
आगामी शुक्रबारदेखि नेपाली सिनेमा हलमा दुई ठूला हलिउड फिल्म 'ड्युन' र 'भेनम: लेट देयर बी कार्नेज' ले दर्शकलाई हलमा गएर फिल्म हेरेर मज्जा लिने अवसर दिने अनुमान गर्न सकिन्छ।
२२ अक्टोबरमा अमेरिकामा रिलिज भएको साइन्स फिक्सन ड्युन वर्षकै बहुप्रतिक्षित फिल्म हो। फ्रयान्क हर्बर्टको सन् १९६५ मा प्रकाशित उपन्यासमा आधारित ड्युन भेनिस फिल्म फेस्टिभलमा प्रिमियर भएको थियो। ड्युन टोरन्टो फिल्म फेस्टिभलमा समेत प्रदर्शन भएको फिल्म हो।
फिल्मको सफलतासँगै दुई भागमा बन्ने यो फिल्मको सिक्वलको पनि घोषणा भइसकेको छ।
डेनिस भेल्लिन्युभको निर्देशन फिल्मले सकारात्मक प्रतिक्रियासँगै राम्रो व्यापार पनि गरिरहेको छ। टाढाको भविष्यको कथा भन्ने यस फिल्ममा टिमोथी चालमेट, जेन्दया, रेबाका फर्गुसन, अस्कर आइज्याक, जोश ब्रोलिन आदि कलाकार मुख्य भूमिकामा छन्।
शुक्रबार सार्वजनिक हुने अर्को फिल्म 'भेनम' हो। मार्भलको कमिक्स चरित्रबाट लिइएको यो अमेरिकी सुपरहिरो फिल्म बेलायतमा १४ सेप्टेम्बर र अमेरिकामा १ अक्टोबरमा सार्वजनिक भएको हो। टम हार्डी, मिसेल विलियम्स, नाओमी ह्यारिसलगायत कलाकारको मुख्य अभिनय रहेको फिल्म एन्डि सर्किसले निर्देशन गरेका हुन्।
नेपालमा बलिउड तथा हलिउड फिल्म वितरण गर्दै आएको द टि फोक फिल्म्सले वितरण गर्ने दुबै फिल्म क्विएफएक्स सिनेमामा हेर्न पाइने छ।
यी छायांकन र प्राविधिक हिसाबले हलमै गएर सिनेम्याटिक अनुभव लिँदा रमाइलो हुने खालका फिल्म हुन्। यी फिल्मले कोरोनापछिको माहोलमा यी फिल्मले हलमा दर्शक तान्ने अपेक्षा गरिएको छ।
