कमेडियन तथा कलाकार कपिल शर्माले आफ्नो बिहेको भोज फेरि दिने भएका छन्। गत डिसेम्बर १२ मा उनले गिन्नी चटरथसँग बिहे गरेका थिए। यसको झन्डै डेढ महिनापछि भोलि शनिबार उनले बिहेको भोज दिने भएका हिन्दुस्तान टाइम्सले लेखेको छ।
उनीहरूले आफ्ना नतेदार र निकट साथीका लागि डिसेम्बर १४ मा पन्जाबमा भोज दिएका थिए। यस्तै डिसेम्बर २३ मा मुम्बईमा रिसेप्सन थियो।
बिहेको करिब दुई सातापछि 'द कपिल शर्मा सो' पनि सुरू भएको थियो। सोनी च्यानलमा आइरहेको यो सोको लोकप्रियता दिनहुँ बढिरहेको छ। गत वर्ष विभिन्न विवादमा तानिएका कपिल अब आफ्नो काममा फर्किसकेका छन्। बिहे र काम दुवैको सफलताको खुसी मनाउन कपिलले तेस्रोपटक पार्टी गर्न लागेको अनुमान गरिएको छ।
डेढ महिनापछि दिन लागेको पार्टीमा विशेषगरी राजनीतिक नेता तथा कुटनीतिक व्यक्तिहरू आमन्त्रित हुने बताइएको छ। कपिलले प्रधानमन्त्री नरेन्द्र मोदीलाई पनि निम्तो गरेका छन्।
यो पार्टी दिल्लीमा हुनेछ। राती ८ बजेबाट सुरू हुने पार्टीको स्थान भने खुलाइएको छैन।
कपिल अचेल 'द कपिल शर्मा सो' को सुटिङमा व्यस्त छन्। शोमा कपिलका साथै नवजोत सिंह सिद्दु, कृष्णा अभिषेक, चन्दन प्रभाकर, किकु सारडा, भारती सिं, सुमोना चक्रवर्ती, रोशेल राओ र एडवार्ड सोनेनब्लिकले काम गरिरेहका छन्।
