रेनशा वान्तवा राईले निर्देशन गरेको फिल्म 'ज्याकी: आई एम ट्वान्टी वान' पहिलो गीत सार्वजनिक भएको छ।
शुक्रबार काठमाडाैंमा एक कार्यक्रम गर्दै फिल्ममा समावेशी ‘कथा’ बोलको गीत सार्वजनिक गरिएको हो। कार्यक्रममा फिल्मका मुख्य कलाकारद्धय धिरज मगर र जसिता गुरुङले गीतमा नृत्य समेत गरेका थिए।
त्रिशला गुरुङ र रोहित शाक्यको स्वर रहेको गीतमा धिरज र जसिता फिचर्ड छन्। गीतको भिडिओलाई द वाइल्ड रिपर्ज क्रुले कोरियोग्राफी गरेको हो।
किरण थापाको शब्द रहेको गीतमा रोहित शाक्य र किरण थापाले संगीत भरेका छन्।
प्रभु शमशेर जबरा र प्रज्ज्वल शमशेर जबराको निर्माणमा तयार भएको फिल्ममा धिरज र जसितासँगै अरुण क्षेत्रीको पनि मुख्य भूमिका छ।
सुशन प्रजापतिले छायांकन गरेको फिल्मलाई निमेश श्रेष्ठले सम्पादन गरेका छन्। आईकोर फिल्म्स ब्यानरमा निर्माण भएको फिल्म वैशाख २१ गतेदेखि प्रदर्शन हुँदैछ।
रेनशाले निर्देशन गरेको पहिलो फिल्म ‘इन्टु मिन्टु लण्डनमा’ ले बक्स अफिसमा राम्रो व्यापार गरेको थियो।
