बाढी प्रभावित क्षेत्रमा सरकारी खाद्य कम्पनी नेपाल खाद्य व्यवस्था तथा व्यापार कम्पनी र साल्ट ट्रेडिङले खाद्यान्न वितरण गर्ने भएको छ। मङ्गलबार उद्योग, वाणिज्य तथा आपूर्ति मन्त्रालयमा सरोकारवाला निकायबिच बसेको बैठकले दाल, नुन, चामल, तेललगायतका खाद्य वस्तु गृहमन्त्रालयको सहयोगमा वितरण गर्ने निर्णय गरेको हो।
नेपाल आयाल निगम लगायत साल्ट र व्यापार कम्पनीले मौज्दात बढाउने, वैकल्पिक उपाय प्रयोग गरी आपूर्ति सुचारू गर्न कर्मचारी तयारी अवस्थामा राखी आवश्यक परेको खण्डमा परिचालन गर्ने समेत निर्णय गरेको छ।
आपूर्ति व्यवस्था सहज पार्न अन्तर्राष्ट्रिय व्यापार हुने मार्ग र अन्य व्यापारिक मार्गमा भएको अवरोध यधाशीघ्र हटाउन सडक विभागले पहल गर्ने भएको छ। मन्त्रालयले आपूर्ति व्यवस्थालाई निरन्तरता दिने बताउँदै निजी क्षेत्रलाई समेत विपत्को समयमा आपूर्ति व्यवस्था सुचारू राख्न अनुरोध गरेको छ।
विपत्को समयमा कृत्रिम अभाव, कालोबजारी, नियन्त्रण गर्न वाणिज्य तथा उपभोक्ता हित संरक्षण विभागले तीव्र अनुगमने गर्नेछ।
मन्त्रालयले आपूर्ति व्यवस्था तथा उपभोक्ता हित संरक्षण महाशाखाका सहसचिवको संयोजकत्वमा आपूर्ति व्यवस्थामा समन्वय र सहजीकरण गर्न ‘र्यापिड रेस्पोन्स टीम’ बनाउने निर्णय गरेको छ।